Federasiya prezidenti: “Azərbaycan Dünya kubokunda rekord sayda şahmatçı ilə təmsil olunacaq”

“Azərbaycan bu il Bakıda keçiriləcək Dünya kubokunda rekord sayda şahmatçı ilə təmsil olunacaq”.

Futbolxeber.az saytına açıqlamasında bunu Azərbaycan Şahmat Federasiyasının prezidenti Mahir Məmmədov deyib.

M.Məmmədov qazanılan nəticənin azərbaycanlı şahmatçıların bacarığının göstəricisi olduğunu vurğulayıb: “Dünya kubokunda 17 şahmatçımız çıxış edcək. Bu isə Azərbaycan şahmatı üçün mütləq rekorddu. Buna qədər Dünya kubokunda heç 10 şahmatçı ilə belə təmsil olunmamışdıq. 17 nəfərdən 3-ü turnirə “Wild card”, yəni təşkilatçı kimi qatılacaq. Digər 14 nəfər isə vəsiqə əldə edib. Bu, bizim şahmatçıların bacarığını göstərir”.

O, təkcə kişi deyil, qadın şahmatçılarımızdan da uğurlu nəticə gözlədiklərini bildirib: “Bildiyiniz kimi, 2019-cu ildə Teymur Rəcəbov Dünya kubokunun qalibi olmuşdu. Bu, komanda şəklində qazandığımız Avropa çempionluqları ilə birlikdə Azərbaycan şahmatı tarixində ən yüksək zirvələrindən biridi. Ümidvarıq ki, idmançılarımız turnirdə uğurlu çıxış edəcəklər. Qızlara da böyük ümidimiz var”.

Qeyd edək ki, Bakıdakı Dünya kuboku 29 iyul-26 avqust tarixlərində keçiriləcək.

Fərəc ASLANOV

Futbolxeber.az-ın teleqram kanalına abunə olun