Rəşad Sadıqov 100-cü qələbəsini “Futbolxeber”ə şərh etdi: “Bu barədə mətbuatda xəbər tutdum”

“Zirə”nin baş məşqçisi Rəşad Sadıqovun Futbolxeber.az saytına müsahibəsi

- “Karvan-Yevlax”la oyunda “Zirə”nin baş məşqçisi kimi 100-cü qələbənizi qazandınız...

- Açığı, bunu əvvəldən bilmirdim. Bu barədə mətbuatdan xəbər tutdum. Təbii olaraq sevindirici haldır. Davamlı olsun inşallah. Allah bizə daha çox, daha böyük zəfərlər nəsib eləsin.

- “Zirə”nin baş məşqçisi kimi ilk oyununuzu xatırlayırsınız?

- Bəli, ilk oyunum yadımdadır. Səfərdə “Qəbələ”yə qarşı 1:1 oynamışdıq.

- Bəs ilk qələbəniz?

- Elə növbəti oyunda ilk qələbəni qazandıq. Rəqib də “Səbail” idi.

- “Zirə”nin baş məşqçisi kimi 200, 300-cü qələbələr planlarınızda var, yoxsa gələcəkdə Rəşad Sadıqovu başqa yerdə görəcəyik?

- Məni “Zirə”də hər şey qane edir. Burada olmaq mənim üçün çox xoşdur. İstərəm ki, birlikdə uzunmüddətli işlər görək.

- Amma yəqin ki, gələcəkdə futbolçu vaxtlarınızda olduğu kimi, məşqçilik karyeranızda da ölkə xaricində işləməyi hədəfləyirsiniz.

- Əlbəttə. Bu, qarşımdakı hədəflərdən biridir. Bir gün baş məşqçi kimi özümü xaricdə sınamağı çox istəyirəm.

- Adətən məşqçilər yerli rəqiblərin oyunlarını stadiondan izləmirlər. Sizə isə “Turan Tovuz”un “Şamaxı” ilə görüşünə stadiondan tamaşa etdiniz. Bunun xüsusi bir səbəbi var idi?

- Xeyr. Sadəcə sırf “Turan Tovuz”un oyununa canlı baxmaq istəyirdim. Dediyiniz kimi, növbəti rəqibimiz Tovuz klubudur. 1 gün əvvəl də “Araz-Naxçıvan” - “Sumqayıt” oyununu stadiondan izlədim. Çünki digər iki rəqibimiz də həmin kollektivlərdir.

Fərəc Aslanov