Hədəflər ayrıdırsa... - QEYD

Yoxlama oyununda “Kəpəz”in “Şamaxı”ya 1:6 hesabı ilə uduzması geniş müzakirələrə yol açıb. Sosial şəbəkələrdə gəncəli azarkeşlərin bir qismi yenilgiyə görə baş məşqçi Adil Şükürovu hədəf seçib. Bəli, bu cür məğlubiyyət heç kimə xoş deyil. Lakin birincisi, adından da göründüyü kimi, bu, yoxlama oyunudur. Bu cür matçlar məhz səhvləri, çatışmazlıqları görmək üçündür. Sabah çempionatda “Kəpəz” “Şamaxı”nı 6 yox, 1 qolla belə üstələsə, bu məğlubiyyət heç kimin yadına düşməyəcək. Adil Şükürov daha əvvəl “Kəpəz”də nəyə qadir olduğunu göstərib. İmkan verilsə, normal şərait yaradılsa, növbəti mövsümdə də komanda onun rəhbərliyi altında lazımi nəticəni əldə edəcək. 

İkincisi, hazırda “Kəpəz”də aşkar oyunçu çatışmazlığı var. Yay fasiləsində komandanı 14 nəfər tərk edib. Onların əvəzində isə cəmi 5 transfer reallaşdırılıb. Maraq üçün qeyd edək ki, yoxlama oyununda “Kəpəz”i top atəşinə tutan “Şamaxı” yayda 8 futbolçu ilə güclənib. Odur ki, Gəncə təmsilçisi gedənlərin yerini doldurmaq üçün minimum 7-8 yeni transferlə güclənməlidir. Əks halda bu cür ağır məğlubiyyətlər çempionatda da yaşana bilər.

“Kəpəz” azarkeşləri bir məsələdə haqlıdırlar ki, komanda gecikir. Yeni mövsümün startına cəmi 17 gün qalıb. Futbolçuların gəlişi, komandaya uyğunlaşması, optimal formaya düşməsi, adaptasiya prosesini keçməsi və s. bütün bunlar vaxt aparacaq. “Kəpəz” rəhbərliyi yaxşı olar ki, bütün bunları nəzərə alsın.

Gəncə klubunun rəhbərliyinin isə başı hazırda struktur dəyişikliyinə qarışıb. Bu günlərdə klubdan verilən açıqlamada qeyd olundu ki, İdarə Heyətinin sədri Namiq Qədirov klubdan ayrılıb. Onun əvəzinə Adil Vəliyev İdarə Heyətinə rəhbərlik edəcək. Maraqlıdır, Gəncə klubunda qısa müddətdə nə baş verdi ki, 2-3 ay ərzində İdarə Heyətinin sədri yenidən dəyişdi? Əslində, çox şey baş verib.

Daha əvvəl də qeyd etmişik, “Kəpəz”də son illər idarəçilik baxımından çox ciddi problemlər olub. Yeni rəhbərlik uğur qazanmaq istəyirsə, ilk növbədə klubu yox, öz mənafeyini düşünən kadrlardan da qurtulmalıdır. Təkcə İlqar Nadirini göndərməklə vəziyyət düzələn deyil. Bir klubda daxili toplantıdan 3 dəqiqə sonra mətbuat iclasda yaşananlardan nöqtə-vergülünə qədər xəbər tutursa, deməli, vəziyyət arzuolunan deyil. Təbii ki, həmin şəxslər Adil Şükürova da, başqalarına da işləməyə imkan verməyəcəklər. Odur ki, uğur qazanmaq üçün “Kəpəz” həmin kadrlardan qurtulmalı, eləcə də baş məşqçi və rəhbərlik eyni məqsəd üçün çalışmalıdır. Hədəflər ayrıdırsa, çətin ki, “Kəpəz” ağ günə çıxa...

TAĞI