Həyəcan, qorxu, yoxsa paxıllıq?

Sakitlik hökm sürdüyü Azərbaycan futbolu dünən bir xəbərlə yerindən oynadı. AFFA-nın sabiq baş katibi və icraçı vitse-prezidenti, son illər FİFA-nın Avropa Milli Assosiasiyaları Departamentinin direktoru postunu tutan Elxan Məmmədov yeni vəzifəyə təyinat aldı. Belə ki, noyabrın 1-dən etibarən E.Məmmədov FİFA-da Üzv Assosiasiyaların direktoru postunu tutacaq. Bir azərbaycanlının, həmyerlimizin FİFA kimi mötəbər qurumda, daha da yüksək vəzifəyə irəli çəkilməsi futbolumuz, ölkəmiz adına böyük uğurdur. Lakin təəssüf ki, təyinatın açıqlanmasından sonra bəzi reaksiyalar heç də xoş deyil. Azarkeş hər zaman fikrini ifadə etməkdə sərbəstdir. Amma heç kim inciməsin, bu təyinatın yanında rüşvət kəlməsini işlətmək absurddur...

SOCAR-ın pulları belə gəldi, rüşvət elə getdi. Guya bu günə qədər güləş, yaxud cüdo federasiyası beynəlxalq qurumlara az sponsorluq edib? Yaxud İnfantinonun pulu qurtarıb ki, rüşvətə ehtiyac duysun? Rüşvətlə olsaydı, bu cür yüksək vəzifə pulu konfet kağızı əvəzinə xərcləyən ərəblərdən birinə tapşırılardı, azərbaycanlıya yox.

Kim nə deyir desin, bu gün bir azərbaycanlının FİFA-da Üzv Assosiasiyaların direktoru vəzifəsinə təyin edilməsi ölkəmizin adına uğurdur. Gerisi təfərrüat...

Futbol adamlarını başa düşmək olar. Kimisi həyəcanlanır, kimisə qorxur. Kimisi də Elxan Məmmədovu “satdığı” üçün bəlkə də dünəndən gözünə yuxu getmir. Hər halda anlaşılandır. Çünki loru dildə desək, AFFA belə dolayısı ilə bu gün FİFA-da Üzv Assosiasiyaların direktoruna, yəni Elxan Məmmədova tabedir... Burda deyirlər e, həyatdı da Zaur...

Dünənki təyinat həm də Elxan Məmmədovu gözü götürməyənlər, “o, AFFA prezidenti olmaq istəyir”, “müqaviləsi başa çatan kimi FİFA-dan göndəriləcək” deyənlərin/yazanların/iddia edənlərin arzularını/xəyallarını puç etdi.

FİFA-nın baş katibi Mattias Qrafströmün “Elxan Məmmədov irəli çəkilməyə tamamilə layiqdir. O, ardıcıl olaraq liderlik, yaradıcılıq və bütün dünyada futbolun inkişafına dərin bağlılıq nümayiş etdirib. Biz onun bu yeni vəzifədə uğurlarının davamını gözləyirik” açıqlaması isə həmin şəxslərin yaralarına lap duz səpdi... Gör indi sabah Elxan Məmmədov FİFA-nın baş katibi, yaxud prezidenti seçilsə, nələr olar... Niyə də yox?!

Bir də ki, FİFA-nın baş katibinin açıqlaması havayıdan deyilməyib. Elxan Məmmədov AFFA-da işlədiyi müddətdə də sırf öz sahəsinə aid işlərdə uğurlu olub. Qızlar arasında U-17-lərin dünya çempionatı, oğlanlar arasında U-17-lərin Avropa çempionatı, Avroliqanın finalı, Avro-2020-nin üç qrup və bir 1/4 final oyunu - ölkəmizdə keçirilən bütün bu mötəbər yarışlar Məmmədovun beynəlxalq qurumlarda qurduğu uğurlu əməkdaşlığın nəticəsi idi...

İBRAHİM