Şahin Diniyev: “Heç nə itirilməyib”

"Səbail"in baş məşqçisi Şahin Diniyev Azərbaycan Premyer Liqasının 27-ci turunun "Neftçi" ilə görüşündən (0:3) sonra mətbuat konfransında iştirak edib.

Futbolxeber.az saytının məlumatına görə, təcrübəli mütəxəssis komandasının məğlubiyyətini belə şərh edib: "Oyunu iki hissəyə bölərdim. 3:0 darmadağın deməkdir. Bu hesab bir qapıya gedən, komandanın mərkəzi keçməməsi deməkdir. Amma biz 0:3 hesablı məğlubiyyətə layiq deyildik. Komanda ikinci hissə diktə etdi, dominantlıq göstərdi. Qol epizodlarımız çox idi. Heç bu qədər epizod yaratdığımız yadıma gəlmir. Sadəcə keyfiyyət məsələsində geri qaldıq. İrəli baxmalıyıq. Təəccüblü olsa da, komandamın oyunundan, xarakterindən, hücumameyilli oynamasından razı qaldıq. "Neftçi" kimi böyük komandanı 90 dəqiqə ərzində təzyiqdə saxlamışıqsa, gələcəyə ümidlə baxmaq olar. Heç nə itirilməyib. Doqquz oyunluq marafonun finiş nöqtəsi var. Komanda ilə istədiyimiz yerlərə çatacağıq. Sadəcə asan qollar buraxırıq. Cərimə meydançasına atılan hər bir top bizim üçün faciəyə bərabərdir. Üçüncü qoldan danışmaq istəmirəm. "Neftçi"yə uğurlar arzu edib, təbrik edirəm. Qarşıdakı oyunlarımıza baxmalıyıq. Düzgün yoldayıq. Bütün oyunlarda keyfiyyətli futbol oynamağa çalışırıq. Alınır da".

Diniyev oyunla tablodakı nəticənin düzgün gəlmədiyini söyləyib. O, müdafiə xəttində səhvlərə yol verməklərinə də toxunub: "Hər bir komandanın uğur qazanması üçün bəzi nüanslar çox vacibdir. Onların içərisində ənənə məsələsi var. "Neftçi" bu gün pis vəziyyətdə ikinci yeri tutanda, bəyənmirlər. Bu ənənədən xəbər verir. "Səbail" yenidir. Keçən il saman çöpündən tutub Premyer Liqada qalmaq uğrunda mübarizə apardıq. Yayda komanda 80-90 faiz yenidən quruldu. Futbolda üç nüans var: stabil heyət, stabil oyun və stabil nəticə. Bu üçü bir-birini bağlıdır. Bizdə bunlardan biri hər zaman kənara çıxır. Stabilliyin olmaması zaman məsələsidir. Komandanın qarşısına qoyulan ən minimum vəzifə həll olunub, artıq iddialılar içərisindəyik. Oyunumuz var. "Səbail" futbol oynayır. Ən çox tam əmin olmadığım yer müdafiədəki oyunumuzdur. Onu düzəldə bilməmişik. Futbolçularım yaxşıdır. Zamanla onu da yoluna qoysaq, "Səbail" Azərbaycan çempionatında ən yaxşı futbol oynayan komandalardan biridir".

AFFA "Səbail"in, sabiq futbolçusu Tural Bayramlıya 70 min manat pul ödəməli olduğuna qərar verib. Lakin klub bunu yerinə yetirmir. Futbolçu FİFA-ya şikayət edib və martın 30-na qədər həmin pul ödənilməlidir. Bu vəziyyət həll olunmasa kluba transfer qadağası qoyula bilər və komandanın avrokuboklara vəsiqəsi əlindən alına bilər. Şahin Diniyev məsələyə münasibət bildirib: "Bu suala mən cavab versəm, etik normadan çıxıram. Klub rəhbərliyi var. Sualın birinci hissəsinə cavab verə bilərəm ki, mən onu yollamamışdım. 18 oyunda 53 dəqiqə meydanda olmuşdu və iki qırmızı vərəqə almışdı. Mən gələndə artıq əvəzedici heyətdəydi. Ondan qabaq yollanmışdı".

"Sumqayıt"ın baş məşqçisi Samir Abasov ötən tur "Gələcəyini komandasını qurmaq istəyirəm, bu mövsüm avrokuboklara getsəm, birinci mərhələdə uduzub qayıdacağıq" deyə fikir bildirmişdi. Ş.Diniyev bunun "Səbail"ə də aid olub-olmadığı haqda deyib: "Ölkədən-ölkəyə çox fərq var. Komandadan-komandaya da. Bu gün baş məşqçilər asılı vəziyyətdə qalan insanlardır. Zamanın verilib-verilməməsi ikinci məsələdir. Hər kəsə bu gün lazımdır. Sabah heç kimə lazım deyil. Bu gün sabahı düşünsək, o sabah olmayacaq. Həmişə reallıqla barışmağa çalışmışam. Bu gün nəyimiz varsa, onunla qane olaq. Radikal addımlar, layihə, gələcəyə addımlar... "Səbail"in yolu düzdür. "Qarabağ", "Neftçi", "Zirə" ilə başabaş futbol oynayırıq, qapazaltı komanda deyilik. Sadəcə stabillik çatışmır. Onu da zamanla bağlayıram. Keçən il dedim ki, Premyer Liqada qalacağıq, qaldıq. Bu il dedim ki, iddialı olacağıq, artıq iddialıyıq. Komanda düzgün inkişaf yolundadır. Dominant oynamaq hər komandanın işi deyil. Komanda darıxdırıcı futbol oynamır. Biz sona qədər mübarizə aparacağıq. Hazırkı futbolla avrokuboklara layiqik. Futbolçularıma dedim ki, üzülməyin, futbol oynayırsız, nəticə gec-tez olacaq. Oyun varsa, nəticə mütləq gələcək. Vay o gündən ki, oyun olmaya, amma qələbələr qazanasan. Sevinirəm ki, komandam futbol oynayır, komandamla fəxr edirəm".

Ş.Diniyev sonda "Səbail"dən Azərbaycan millisinə yalnız Səlahət Ağayev və Rüfət Abdullazadənin dəvət olunmasından danışıb: "Nəsə desəm, deyəcəksiz ki, pafoslu danışırsız. İlk işimiz klub üçün çalışmaqdır, amma həm də, milliyə futbolçu yetişdirməkdir. "Səbail" üçün prestijdir. Ötən il klubumuzdan 10-a yaxın futbolçu yığma komandalarımıza getmişdi. Komada yox, klub olaraq inkişaf etmək istəyirik. Limitdə olan oyunçularımız ən yaxşılardır. Yusif Nəbiyev, Rafael Məhərrəmli, Adil Nağıyev də var, milliyə dəvət edilə bilər. Milliyə düşmək üçün klubda uğur qazanmalısan".