Azər Bağırov: "Çətinliklərin öhdəsindən gəlməliyik"

"Rəqib nə qədər yorğun görünsə də, çətin oyun olacağını bilirdik. "Qarabağ"ı avrokuboklardakı uğuruna görə təbrik edirəm. Bu gün yaxşı oynadıq. Futbolçular arasında adaptasiya getməlidir. Gələcək oyunlarda düzələcək".

Futbolxeber.az saytının məlumatına görə, bunu "Araz-Naxçıvan"ın baş məşqçisi Azər Bağırov Azərbaycan Premyer Liqasının üçüncü turunda "Qarabağ"a 1:2 hesabı ilə uduzduqları oyundan sonra deyib. 

O, hesabı qorumaq üçün nə çatışmaması barədə sualı belə cavablandırıb: "Futbolçulara deyirəm ki, hər zaman motivasiya olmalıdır, konsentrasiya itməməlidir. Futbol hakimin final fitində bitmir. Paltardəyişmə otağında bitməlidir. Uşaqlar kosnentrasiyadan düşdülər. Yorğunluq da ola bilər. Yaxşı oynadıq. Əhsən onlara" 

Azər Bağırov ötən turla müqayisədə heyətdə dəyişiklik etmələrinin səbəbini belə izah edib: "Qurban müəllim çempionat oyunlarında ikinci hissədə güclü oyunçuları meydana buraxır. Biz də istədik ki, ikinci hissədə onları meydana buraxaq".

"Araz-Naxçıvan"ın çalışdırıcısı hakim səhbləri barədə geniş danışmaq istəməyib: "Hakimlik bir şey yoxdur. Görübsə, verəcək. VAR sistemi var. Amma yenə də hakimlik bir şey yoxdur. Onların üzərinə getməyin mənası yoxdur".

Azər Bağırov rəqibin 7 yerli, komandasının isə 7 legionerlə meydana çıxması barədə bunları söyləyib: "Qarabağ"dakı yerlilər neçə illərdir birlikdə oynayır. Onların bir-biri ilə anlaşması legionerlərdən geri qalmır. Üç turdur ki, bir yerdə oynaya bilirik. Birlikdə yoxlama görüşü də keçirməmişik. Uşaqlar bir-birini rəsmi oyunlarda hiss edirlər. Çətindir. Amma çətinliklərin hamısını adlamalıyıq".