Arif Əsədov Asəf Namazovun ittihamlarına cavab verdi: “Yəqin özü belə işlərlə məşğul olub ki...”

“Neftçi”nin sabiq baş məşqçisi Asəf Namazov milli komandamızın hazırkı məşqçisi, vaxtı ilə futbolçusu olmuş Arif Əsədova qarşı ittiham irəli sürüb.

Futbolxeber.az saytının məlumatına görə, “Futbol+” qəzetinə müsahibəsində Namazov 2000-ci ildə UEFA kubokunda (indiki Avroliqa - İ.C.) Sloveniya "HİT-Qoritsa"sına qarşı cavab matçında bəzi futbolçuların AFFA-nın o vaxtkı prezidenti Fuad Musayevin tapşırığı ilə qəsdən zəif oynadıqlarını bildirib: “Fuad Musayev artıq işini görmüşdü. Mənim rəhbərlik etdiyim komanda heç bir halda mərhələ keçməməliydi. Ona görə də onun əlaltısı olan oyunçular “qara iş” görməliydi. Onlardan da biri hazırda millimizdə köməkçi məşçi olan Arif Əsədov idi. Bilərəkdən kobud səhv etdi və qapımızda 3-cü qolu gördük”.

Arif Əsədov Futbolxeber.az saytına müsahibəsində Asəf Namazovun ittihamlarına cavab verib. O bildirib ki, Sloveniyada keçirilən görüşdə meydanda ən yaxşılardan biri olub: “Mən istəməzdim dediklərinə cavab verim, onun səviyyəsinə enim. Amma digər tərəfdən də cavab verməsəm, elə bilər ki, o, düz deyir. Buna görə məcburam onun ittihamlarına cavab verməyə. Ümumiyyətlə, bu haqda xəbərim yox idi, indi sizdən eşidirəm. Əgər belə ittiham irəli sürübsə, mən belə cavab verə bilərəm ki, hər bir insan öz düşündüyü, öz elədiyi, öz bildiyi qədər başqasını ittiham edə bilər. Yəqin Asəf Namazov özü vaxtı ilə belə işlərlə məşğul olub ki, hansısa bir səhvə o nöqteyi-nəzərdən yanaşır. İkincisi də, istəyən şəxs həmin oyunun videoyazısına baxa bilər. Təvazökarlıqdan uzaq olsa da, həmin maçtda meydanda ən yaxşılardan biri mən idim, özü də komandanın kapitanı idim. Oyundan sonra mərhələ adlaya bilmədiyimiz üçün əsəbimdən ağlayırdım.

A.Əsədov qeyd edib ki, həmin vaxt “Neftçi” mərhələ adlasaydı, “Roma” ilə üz-üzə gələcəkdi: “Həmin oyunda biz mərhələ adlasaydıq, növbəti turda məşhur “Roma” klubuna rəqib olacaqdıq. O vaxta kimi Bakıya bu cür rəqib gəlməmişdi. Ona görə də, hamımızın arzusu idi ki, bu cür top komandanı Bakıya gətirək. Lakin təəssüf ki, 1:3 hesablı məğlubiyyət bu arzumuzun üzərindən xətt çəkdi”.

Sloveniyadakı matçda baş verənləri xatırlayan Əsədov keçmiş baş məşqçisinin səhv əvəzetmələrə yol verməsinə işarə edib: “Yaxşı olardı ki, Asəf Namazov həmin oyunda öz elədiyi dəyişikliklərə baxardı. Oyunu necə dəyişdiyini yada salardı. Məşqçi var ki, əvəzetmələrlə oyunu müsbətə doğru dəyişir, məşqçi də var ki, oyunu uduzdurur. Məni itiham etməkdənsə, yaxşı olardı ki, Asəf Namazov həmin görüşdəki etdiyi dəyişiklikləri xatırlasın”.

Millimizin məşqçisi bildirib ki, hər zaman təmiz adı uğrunda yaşayıb: “Özünüz futbol nəticələrimə baxın. Mən həyatda hər zaman birinci ad-sanı, imici düşünmüşəm və onun uğrunda mübarizə aparmışam. Mənim üçün qazanılan çempionluqlar, medallar, titullar bu gün ən xoş xatirə, sevinclə xatırladığım uğurlardı. Heç vaxt pulu düşünməmişəm”.

Əsədov bu məsələdə Fuad Musayevin adının hallanmasını ümumiyyətlə anlamadığını söyləyib: “Allah Fuad Musayevə rəhmət eləsin. Həmin vaxt Fuad Musayev “Neftçi”nin yox, federasiyanın prezidenti idi. Onun “Neftçi”yə nə aidiyyəti var?”

İbrahim CƏFƏROV