Şahruddin Məhəmmədəliyev: “5:0 hesabı oyunun real mənzərəsini əks etdirmir”

“Qarabağ”ın qapıçısı Şahruddin Məhəmmədəliyevin Futbolxeber.az saytına müsahibəsi

- “Səbail”lə sönük keçən oyunun sonlarında ardıcıl qollarla qalib gəldiniz. Böyük hesablı qələbəni necə şərh edərdiniz?

- Xüsusən birinci hissə bizim üçün çox çətin alındı. “Səbail” çempionatda ən yaxşı oyun sərgiləyən komandalardan biridir. Topu özlərində yaxşı saxlayırlar, paslaşırlar, düşünülmüş hücumlar qururlar. “Səbail”in oyununu çox bəyənirəm. 5:0 hesabı matçın real mənzərəsini əks etdirmir.

- 75-ci dəqiqəyə qədər hesab açılmasa da, sonradan ardıcıl qollar gəldi. Hesabın bu həddə çatmasını nə ilə əlaqələndirmək olar?

- Rəqib uduzmaq istəmirdi. Buna görə də qol buraxdıqdan sonra irəli atıldılar, hesabı bərabələşdirməyə çalışdılar. Risk etdilər. Bunun da nəticəsində müdafiədə boşluqlar yarandı. Biz də bundan faydalandıq.

- “Səbail”in qapıçısı Əlirza Müştəbazadə sanki sizi xatırladır. Ayaqla çox rahat oynayır, tez-tez irəli çıxır. Onun çıxışını necə qiymətləndirirsiniz?

- Onun oyununu çox bəyəndim. Ayaqla inamlı oynayır, çox soyuqqanlıdır. Əla təsir bağışlayır. “Səbail”də ümumiyyətlə qapıçılar çox yaxşıdırlar. Daha əvvəl digər qapıçı Hüseynəli Quliyevin də oyununa izləmişəm. O da çox inamlı görünür. Ayaqla rahat oynayır, qapı xətti üzərində yaxşıdır. Bu, müasir futbolun elementləridir. Çox sevinirəm ki, bizim gənc qapıçılarımız bu tərz oyuna üstünlük verirlər.

- Son 2 matçda “Səbail”ə qalib gəlsəniz də, “Qarabağ”ın ideal formasından uzaq olduğu görünür...

- Əslində tam gücümüzlə çalışırıq. Biz də istəyirik k, nəticələrimiz yaxşı olsun. Məşqlərdə də bunun üçün əlimizdən gələni edirik. İnanıram ki, tezliklə oyunumuz daha da yaxşılaşacaq.  

- Avroliqadakı çıxışdan sonra yaranan psixoloji gərginlik buna səbəb ola bilər?

- Əlbəttə, uduzmaq çox məyusedicidir. Xüsusən də ölkədə hamı sənə ümid edirsə, inanırsa. Avropada biz Azərbaycanı təmsil edirik. Ümidləri doğrultmayanda isə psixoloji cəhətdən çətin olur. İstənilən halda məyus olursan.

- Növbəti matç “Neftçi” ilədir. Həmin qarşılaşmadan gözləntiləriniz nədir?

- Derbidir. “Neftçi” ilə oyunlarımız həmişə prinsipial keçir. Turnir cədvəlində kimin neçənci olması önəmli deyil, bu, derbidir. Azarkeşlər üçün gərgin oyun olacaq. Stadionun dolacağına inanıram. Qarşıda bizi çox maraqlı və gərgin matç gözləyir.

İbrahim Cəfərov