“Zirə”nin debütantı: “Araz-Naxçıvan” mənim üçün prinsipial rəqibdir”

“Heç bir oyun asan keçmir. Bu matç da istisna olmadı. Qələbəni çətinliklə əldə etdik. “Şamaxı” yaxşı mübarizə aparırdı, qaçırdılar. Yekunda qalib gəldik və buna görə çox şadıq”.

Futbolxeber.az saytına müsahibəsində bu sözləri dünən “Şamaxı” ilə matçda (2:0) “Zirə”nin heyətində ilk oyununa çıxan İldar Alekperov deyib.

“Zirə”nin debütantı qeyd edib ki, son 3 turda qələbə qazanmasalar da, bu, komandada psixoloji gərginlik yaratmayıb: “Məşqçilərin tapşırıqlarını yerinə yetirir, üzərimizə düşəni edirikdik. Biz baş məşqçimizə, bir-birimizə güvənirik. Bunun da nəticəsini gördük. “Şamaxı” üzərində qələbə qazandıq”.

O, bu qələbədən sonra uğurlu seriya yaxalayacaqlarına inanır: “Biz hər oyuna qələbə üçün çıxırıq. Heç vaxt başqa nəticə barədə düşünmürük. Əvvəlki 3 turda qalib gəlməsək də, özümüzə inanırıq. Düşünürəm ki, bu qələbə uğurlu seriyanın başlanğıcı olacaq”.

23 yaşlı futbolçu qarşıdakı “Araz-Naxçıvan”la matçın onun üçün mühüm əhəmiyyət kəsb etdiyini bildirib: “Araz-Naxçıvan” mənim üçün prinsipial rəqibdir. Çünki ötən mövsüm orada icarə əsasında oynadım. Lakin alınmadı. Odur ki, özümü həm özümə, həm də onlara sübut etmək istərdim”.

İldar Alekperov sıx qrafikdə oynamağın onlar üçün çətinlik yaratmadığını qeyd edib: “Əvvəlcə “Araz-Naxçıvan”la təxirə salınmış oyunda üz-üzə gələcəyik. Daha sonra isə “Qarabağ”la qarşılaşacağıq. Düzdür, ardıcıl matçlar keçirmək heç də asan deyil. Lakin komanda artıq bu rejimə öyrəşib. Yayda “Zirə” avrokuboklarda oynayanarkən qrafik bundan da sıx, bundan da çətin idi. Ona görə də indiki durumda hansısa çətinlik çəkəcəyimizi düşünmürəm. Hazırlaşıb, xallarımızı qazanacağıq”.

Fərəc Aslanov