Mehdi Cənnətov: “Kurban Berdıyev “Turan Tovuz”a elə-belə gəlməyib”

“Bir qədər yorğunluq var idi. Çünki oyuna qədər vaxtımızın çox hissəsini səfərdə keçirmişdik, uçuşda, yollarda olmuşduq. Buna baxmayaraq, uşaqlara əhsən. Tempi qorudular, baş məşqçinin tapşırıqlarını yerinə yetirdilər. Əsas olan budur”.

Futbolxeber.az saytına müsahibəsində bu sözləri “Sumqayıt”ın qapıçısı Mehdi Cənnətov Azərbaycan Premyer Liqasının ilk turunda “Kəpəz”i 2:0 hesabı ilə məğlub etdikləri oyun barədə danışarkən deyib.

32 yaşlı futbolçu UEFA Konfrans Liqasında mübarizəni dayandırdıqdan sonra Gəncə klubu ilə görüşə əsasən psixoloji cəhətdən hazırlaşdıqlarını bildirib: “Prinsipcə oyuna hazır idik. İlk növbədə də psixoloji cəhətdən. Vaxt məhdudiyyətinə görə daha çox diqqət fiziki yox, məhz psixoloji hazırlığa diqqət ayırdıq. Hiss olunurdu ki, komandada yorğunluq var. Üstəlik, isti hava işimizi bir qədər də çətinləşdirmişdi”.

M.Cənnətov yeni transferlərin zamanla komandaya uyğunlaşdıqlarını qeyd edib: “Komandanın daxilində hər şey yaxşıdır. Təbii ki, yeni gələnlərə komandanın oyun fəlsəfəsinə, baş məşqçinin tələblərinə uyğunlaşmaq üçün müəyyən qədər vaxt lazımdır. Dərhal heç nə olmur. Yavaş-yavaş hər şey qaydasına düşəcək”.

O, bu həftə sonu ikinci tur çərçivəsində “Turan Tovuz”a qarşı keçirəcəkləri matçdan da söz açıb: “Çempionatda asan oyun olmur. Fərqi yoxdur, rəqibin “Turan Tovuz”dur, yaxud “Qarabağ”. Həm də bizi ilk növbədə öz oyunumuz düşündürür. Bütün matçlarda olduğu kimi, Tovuz səfərinə də uğur qazanmaq üçün yollanacağıq”.

“Sumqayıt”ın qolkiperi Azərbaycan çempionatının səviyyəsinin ildən-ilə artdığını bildirib: “Hər il Azərbaycan çempionatı çətinləşir, səviyyə yüksəlir. Komandaların əksəriyyəti ambisiyalıdır. Kurban Berdıyev “Turan Tovuz”a elə-belə gəlməyib. Təbii ki, qarşısına qoyulan məqsədlər var. Yaxud “Zirə” və ya “Sabah” olsun, hansılar ki, Konfrans Liqasında üçüncü mərhələyə yüksəliblər. Bir sözlə, Azərbaycan çempionatında yaxşı rəqabət var, zəif komanda yoxdur. Biz də “Sumqayıt” olaraq uğur qazanmaq üçün əlimizdən gələni edəcəyik”.

Fərəc Aslanov