Ruan Renato: “İnanıram ki, mərhələni keçən tərəf biz olarıq”

"Sabah bizi ilk matçdakından da gərgin oyun gözləyir. Çünki rəqib bu dəfə daha hazırlıqlı, daha motivasiyalı olacaq”.

Futbolxeber.az saytının məlumatına görə, bu sözləri “Zirə”nin müdafiəçisi Ruan Renato sabah UEFA Avropa Liqasının birinci təsnifat mərhələsinin cavab görüşü çərçivəsində “Şerif”ə qarşı keçiriləcək matç barədə danışarkən deyib.

Oyunöncəsi mətbuat konfransına qatılan braziliyalı müdafiəçi azarkeşlərin dəstəyinə ehtiyac duyduqlarını bildirib: “Doğma azarkeşlərimiz önündə oynayacağımızı nəzərə alsaq, inanıram ki, mərhələni keçən tərəf biz olarıq. Azarkeşlərin dəstəyinə ehtiyacımız var”.

“Hesab xeyrinizə olsa da, sizi narahat edən nədir?” sualını Renato belə cavablandırıb: “Baş məşqçimizin də dediyi kimi, cavab matçında “Şerif” daha motivasiyalı, daha hazırlıqlı olacaq. Müəyyən komponentlərdə rəqib yaxşı oynayır. Hər top uğrunda mübarizə aparırlar. İlk matçdakı qələbə bizi növbəti mərhələyə daşımır. Sabah diqqətli olmalıyıq. Yaxşı müdafiə olunub, hücumda da şans axtarmalıyıq”.

O, ilk görüşdə müdafiə xəttinin üzərinə daha çox iş düşdüyü fikri ilə razılaşıb: “Rəqib bu dəfə daha çox irəli atılacaq. "Şerif" də nəticə qazanmaq istəyir. Onlara qarşı oyun təcrübəmiz var. Rəqibi analiz etmişik. Rəqibin nəyə qadir olduğunu bilirik. Əmin olun ki, bacardığımızın ən yaxşısını edəcəyik”.