Rəngarəng “Tarixlər”in AĞ-QARA görüşü - TƏƏSSÜRAT

İstanbul... Hər kəsin ömründə ən azı bir dəfə ziyarət etmək istədiyi şəhər... İstanbul tarixin özüdü. Bu səbəbdəndi ki, şəhərin tarixi məkanları nə gəzməklə, nə də saymaqla bitər...

“Neftçi” isə Azərbaycan futbolunun tarixidi. Bu gün “ağ-qaralar” “Qarabağ” kimi ardıcıl 10 il avrokubokların qrup mərhələsində oynamasa da, uzun illər boyu Azərbaycan futbolu dedikdə yada düşən ilk isim “Neftçi” olub. Məşhur “Neftçi” topu ifadəsindən tutmuş köhnə filmlərimizdəki “ağ-qaralar”la bağlı replikalara kimi xeyli nümünə gətirmək olar.

“Neftçi”nin yeni rəhbərliyi də məhz klubun əzəmətini özünə qaytarmaq istəyir. Məqsəd “Neftçi”nin təkcə dünəni ilə yox, həm də bu günü ilə də öyünməsidi...

Bu yolda flaqmanın ilk sınağı UEFA Konfrans Liqası idi. “Jelezniçar” səddi bir qədər çətinliklə keçilsə də, ümidlər böyük idi. Həm Adrian Mutunun baş məşqçi vəzifəsinə gətirilməsi, həm də yeni transferlər “Neftçi”nin Konfrans Liqasında daha irəli gedəcəyinə olan ümidləri artırırdı. Lakin sən saydığını say, gör püşk nə sayır...

“Neftçi”nin üçüncü mərhələdəki rəqibi “Beşiktaş” oldu ki, 2 “ağ-qara” arasındakı fərq ümidlərin üstündən xətt çəkdi. Açıq deyək ki, Bakıda ikinci hissədə yaxşı oynasa da, İstanbulda hesabda önə keçsə də, reallıq budu ki, bugünkü “Neftçi” “Beşiktaş”la mübarizə aparacaq gücdə deyil... Azərbaycan klublarının heç vaxt qardaş ölkə təmsilçilərini üstələyə bilməməsi statistikanın da “Neftçi”nin əleyhinə olduğunu göstərirdi.

Bununla belə, səfərə 2 gün əvvəldən gedən “Neftçi” oyunöncəsi məşqdə ümidli görünürdü. Komandadakı yüksək əhval-ruhiyyə “Beşiktaş”ı mübarizədən kənarlaşdırmaq olar” möcüzəsinə ümid verirdi...

Girişdə də qeyd etdiyimiz kimi, İstanbul dünyanın ən möhtəşəm şəhərlərindən biridi. Şəhərə çatdığımız andan İstanbul insanı öz aurasına aldı. Xaotik vəziyyətinə görə hazırda bəzi Hindistan şəhərlərinə bənzəsə də, İstanbul həmişəki kimi ziyarətçilərinin könlünü oxşayır. Oyuna artıq 1 gün qalmış stadionun ətrafında ciddi hazırlıq işləri gedirdi. Beşiktaş bölgəsində sərin külək əssə də, hər kəs sabahkı “fırtına”nın düşüncəsindəydi...

EMİN MAHMUDOV - 1 YERLİ DƏYƏR 10 LEGİONERƏ

Oyunun startına 5-6 saat qalmış stadionun qarşısına gəlib şəkil çəkdirən, forma, şərf alan azarkeş toplusunun xüsusi həyəcanını görməmək mümkün deyildi. Təəssüf ki, yerli azarkeşlərin bu həyəcanı rəqiblə bağlı deyildi. Çünki “Beşiktaş” fanatları sevimli komandalarının doğma meydanda rahat qələbə qazanacağına arxayın idilər. “Neftçi”ni isə çətin səfər matçında Bursa, Ankara və digər şəhərlərdən gəlmiş 100-dən çox azərbaycanlı dəstəkləyirdi. Start fitindən sonra onlar dəstəkləri ilə “Neftçi”nin 12-ci oyunçusuna çevrilməyə çalışırdılar. 36-cı dəqiqəqə onlar da, biz də “Neftçi”nin qolunun sevincini yaşadıq. Ozobiçi də legioner saysaq, meydanda cəmi 1 yerli futbolçu var idi. Futbol hər nə qədər komanda oyunu olsa da, qol vuranın məhz Emin Mahmudov olması maraq doğuran məqamdı. Təcrübəli yarımmüdafiəçi əlinə düşən fürsətdən maksimum dərəcədə yararlanmaqla daşıdığı sarğının məsuliyyətini ortaya qoydu.

UĞULTU SƏDALARI, AZARKEŞ “PARTLAYIŞ”I

Hər nə qədər yerli azarkeşlər tribunaları doldurmasalar da, onların sayı heç də az deyildi. Mahmudovun qolu isə yerli publikanı özündən çıxardı. Təkcə stadiondakı deyil, sosial şəbəkələrdəki “Beşiktaş” azarkeşləri də yenilgini ağıllarından belə keçirmirdilər. Həmin anlarda kimi baş məşqçi Şenol Güneşi “yıxıb-sürüyürdü”, kimisi də futbolçuları. Təəssüf ki, “Neftçi” ikinci hissədə üstünlüyünü qoruya bilmədi. Vinsent Abubakarın vurduğu qol ustalığının göstəricisi idi.

“NEFTÇİ” UDUZSA DA, ÜMİD VERDİ

Hesabı bərabərləşdirdikdən sonra daha da ümidlənən “Beşiktaş” az sonra ikinci qolu da vurdu. Beləcə, “Neftçi” Bakıda olduğu kimi, səfərdə də rəqibinə məğlub oldu. Uduzmağına baxmayaraq, oyundan sonra Adrian Mutunun da dediyi kimi, “Neftçi” mübarizliyi ilə İstanbula turist kimi yollanmadığını sübut etdi. Komanda bacardığını etdi. “Neftçi” döyüşkənlikdə “Beşiktaş”dan geri qalmasa da, ustalıq səviyyəsini sözünü dedi. “Neftçi”nin bu çıxışı isə gələcəyə ümid verir. Artıq prioritet ölkə çempionatıdı. “Neftçi”nin yeni rəhbərliyinin də, Mutunun da, yeni transferlərin də özlərini sübut etmək üçün sadəcə bir yol var - çempion olmaq...

Azad NURİYEV,

Bakı-İstanbul-Bakı