Ndlovu: "Hiss etdim ki, Qurban Qurbanov mənimlə müqavilənin uzadılmasını istəmir"

"Xançjou Qrintaun”un özüm və ailəm üçün ən doğru qərarlardan biridir. Hələlik Çində hər şey yaxşıdır, bir şikayətim yoxdur. Aradakı böyük saat fərqinə uyğunlaşmağa çalışıram".

Futbolxeber.az saytının məlumatına görə, bu sözləri "Qarabağ"dan ayrılaraq Çinin "Xançjou Qrintaun” klubuna transfer olan Dino Ndlovu kickoff.com saytına açıqlamasında deyib.

O, Çin klubunda da hədəfinin dəyişməyəcəyini bildirib: "Fərdi hədəflərim heç vaxt dəyişməyib. Sadəcə, "Qarabağ"da etdiyimdən də ən yaxşısını etməyə çalışacam. Çoxlu qol vurmaqla komandamın Superliqaya vəsiqə qazanmasına kömək etmək istəyirəm".

D.Ndlovu “Qarabağ”ı tərk etməsinin səbəbi haqda da danışıb: "Qarabağ"dan ayrılmaq istəmirdim. Ancaq müqaviləmin müddəti başa çatırdı. Baş məşqçi ilə (Qurban Qurbanov nəzərdə tutulur - red.) yeni müqavilə haqda danışdım. Onun mənimlə müqavilənin müddətini uzadılmasını istəmədiyini hiss etdm. Özümlə və ailəmlə bağlı realist olmalıydım. Gələcəyimi təminat altına almaq istəyirdim. Çünki bir daha gənc olmayacam, yaş artır. Bu fürsəti dəyərləndirib Çinə getməyə qərar verdim”.