Marçello Lippi məşqçi karyerasını başa vurdu

Tanınmış italiyalı mütəxəssis Marçello Lippi məşqçi karyerasını başa vurub. Futbolxeber.az-ın məlumatına görə, ardıcıl üçüncü dəfə “Quançjou Everqrand” klubuna Çin çempionu adını qazandıran Lippi deyib: “Mən daha məşqçi kimi çalışmaq istəmirəm. Bunun üçün çox yaşlıyam. Yeni mövsümdə komandanı başqa məşqçi çalışdıracaq”.

Baş məşqçi vəzifəsindən ayrılan Lippi, Çin klubunu tərk etməyəcək. Bundan sonra o, komandada texniki direktor postunu tutacaq.

Qeyd edək ki, buna kimi “Sampdoriya”, “Atalanta”, “Çezena”, “Napoli”, “Yuventus”, “İnter” kimi klublarda, eləcə də İtaliya millisində çalışan Lippi, 5 dəfə İtaliya çempionluğunu, 4 dəfə ölkə Superkubokunu, 1 dəfə İtaliya kubokunu, 1 dəfə Çempionlar Liqasını, 1 dəfə UEFA Kubokunu qazanıb. 2006-cı ildə Lippi İtaliya millisini dünya çempionluğuna daşıyıb.