Edvin Kuç: “Kəpəz”i udaq, “Qarabağ”ı sonra düşünərik”

“Bizim üçün vacib matç idi. Qələbə qazanmalı idik. Buna görə də görüşə çox ciddi hazırlaşmışdıq. Oyuna yaxşı başladıq. Erkən qol vurduq. Lakin ikinci hissədə bir qədər hücumda fəal deyildik, ilk 45 dəqiqədəki kimi oynamadıq. Bununla belə, çox çalışdıq və yekunda da istədiyimizə nail olduq”.

Futbolxeber.az saytının məlumatına görə, bu sözləri “Neftçi”nin yarımmüdafiəçisi Edvin Kuç Azərbaycan Premyer Liqasının 19-cu turunda “Qəbələ”ni 1:0 hesabı ilə məğlub etdikləri oyun barədə danışarkən deyib.

O, son turlar “Neftçi”nin daha inamlı təsir bağışladığını bildirib: “Yüksək pillələr uğrunda mübarizə aparırıq. Düzdür, mövsümün startı bizim üçün bir qədər uğursuz alındı. Lakin son turlar komandamız daha yaxşı nəticələr qazanır. Bu cür də davam etməliyik. Məqsədimiz avrokuboklara vəsiqə qazanmaqdır. Son iki ildə “Neftçi” qitə kuboklarından kənarda qalıb. Bu uğursuzluğa son vermək istəyirik”.

Bosniyalı yarımmüdafiəçi öz çıxışını da dəyərləndirib: “Son zamanlar əsas heyətdə şans qazanmıram. Əlbəttə, mənim də məqsədim meydanda daha çox olmaqdır. Bunun üçün məşqlərdə tam gücümlə çalışıram. Əlimdən gələni edirəm ki, əsas heyətə layiq olduğumu göstərim. Ancaq əsas olan “Neftçi”nin uğurudur”.

32 yaşlı futbolçu komandasının qarşıdakı matçlarından da söz açıb: “Növbəti oyunumuz “Kəpəz”ə qarşıdır. Bizi səfərdə ağır oyun gözləyir. Hazırda “Qarabağ” barədə fikirləşmirik. “Kəpəz”i udaq, “Qarabağ”ı sonra düşünərik. Təbii ki, onların gücünü bilirik. Çətin olacaq. Düşünürəm ki, son iki matçdakı kimi oynasaq, qalib gələrik”.