“Neftçi”nin muradı...

Son günlər “Neftçi”nin yarımmüdafiəçisi Murad Məmmədov istər azarkeşlər, istərsə də sosial şəbəkə istifadəçiləri arasında müzakirə mövzusuna çevrilib. Qısa xatırlatma edək ki, U-21 millimiz seçmə mərhələ oyununda məhz Muradın vurduğu baxımlı qolla səfərdə Cəbəllütariqə qalib gəlib. Bundan sonra bəziləri “Neftçi”ni, bir az da konkretləşdirsək, flaqmanın baş məşqçisi Samir Abasovu Murad Məmmədova lazımınca şans verməməkdə günahlandırır. Lakin bu fikirlər, tənqidlər nə dərəcədə haqlıdır?

Birincisi, ondan başlayaq ki, Cəbəllütariq millisi nə Braziliyadır, nə Fransa, nə də İtaliya. Bu komandaya qol vurmaq üçün fövqəl istedada malik olmaq lazım deyil. Həmin matçda millimizin böyük hesabla qələbə qazanmaması özü biabırçılıqdır. Çünki bu günə qədər Cəbəllütariq U-21 millisi seçmə mərhələdə keçirdiyi 44 oyundan 41-də uduzub. Üstəlik, bu 41 məğlubiyyətdən yalnız 5-i bir top fərqi ilə olub. Elə bir ay əvvəl Cəbəllütariq millisi Şotlandiya və Portuqaliya ilə 2 görüşdə qapısında 23 (!) qol görüb. Uzun sözün qısası, Cəbəllütariqə qol vurmaq böyük uğur deyil.

İkincisi isə, Samir Abasovu bir çox məsələdə qınamaq olar: start heyətini düz qurmamaqda, əvəzetmələrdə gecikməkdə, oyun gedə-gedə azarkeş(lər)lə mübahisə etməkdə (Zirədə olduğu kimi) və s. Lakin “Neftçi”nin çalışdırıcısını bircə gənclərə şans verməməkdə ittiham etmək absurddur. Kim bu iddia ilə çıxış edirsə, deməli, ötən mövsüm “Neftçi”nin oyunlarına baxmayıb. Abasov ötən mövsüm Rza Cəfərov, Ağadadaş Salyanski, Murad Məmmədov, Emil Səfərova kifayət qədər şans verib. Lakin adıçəkilən futbolçular etimadı doğrultmayıblar. Əgər doğrultsaydılar, “Neftçi” yayda qapı, dayaq yarımmüdafiəçisi, vinger, hücumçu mövqeyinə futbolçu axtarmazdı. Elə bu mövsüm də Rzaya, Ağadadaşa, Murada, Emilə şans verərdi. Bu gün adıçəkilən futbolçular ehtiyatda qalırlarsa, günahkar ilk növbədə özləridir. Vaxtında verilən şansdan lazımınca yararlanmaq lazım idi.

Bəli, Murad Məmmədov perspektivli futbolçudur. Lakin bu gün o, MOİK, Cəbəllütariqlə oyunlarda parlayır, “Araz-Naxçıvan”, “Kəpəz”lə matçlarda yox. Daha da inkişaf etmək lazımdır. Yoxsa ki, Samir Abasov da özü-özünə düşmən deyil ki. Baş məşqçinin də arzusu, muradı, qarşısına qoyulan hədəf, məqsəd var. Samir Abasov bu mövsüm “Neftçi”yə minimum ikinci yeri qazandırmalıdır. Əks halda mövsüm onun üçün uğursuz hesab olunacaq. Hədəfə çatmaq üçün isə bu gün Piriçə, Sessiyə, Metyuya, İmada, Varqasa, Abubakara ehtiyac var. Təəssüf, reallıq budur ki, bu iş Rza, Ağadadaş, Murad, Emillə alınasayı deyil. Alınsaydı, ötən mövsüm alınardı...

İBRAHİM