Möcüzə bir dəfə olur...

Möcüzə bir dəfə olur. “Araz-Naxçıvan” da bu haqqını “Aris”lə oyunlarda “xərcləmişdi”. Naxçıvan klubunun əziyyətini yerə vurmaq fikrində deyiləm. Lakin mənə görə, Elmar Baxşıyevin komandasının Konfrans Liqasının ikinci təsnifat mərhələsində Yunanıstan klubunu mübarizədən kənarlaşdırması möcüzə, bəlkə də böyük qəhrəmanlıq idi. Komandadan bundan artığını gözləmək isə sadəlövhlük olardı. Əlbəttə, hər birimiz “Araz-Naxçıvan”ın “Aris” kimi, “Omoniya”nı da mübarizədən kənarlaşdırmasını arzulayırdıq, istəyirdik. Amma reallıqlar var. İstəməklə iş bitmir...

Kipr klubu hələ ötən il “Zirə”ni 6 cavabsız qolla üstələməklə nəyə qadir olduğunu göstərmişdi. Özü də Bakı klubu həmin vaxt heç də indiki “Araz-Naxçıvan”dan zəif deyildi.

Naxçıvan klubunun ən səs-küylü transferi kimdir? “Qarabağ”a lazım olmayan Patrik Andrade. “Omoniya”da isə hücumun mərkəzində Stefan Yovetiç yer alır. O Yovetiç ki, bu günə qədər heç bir azərbaycanlı futbolçunun yaxın düşə bilmədiyi “İnter”də, “Mançester Siti”də oynayıb. “Araz-Naxçıvan”ın qapısını qoruyan Kristian Avramın ölkəmizə gələnə qədər maksimumu Rumıniya ikinci liqası və Moldova klubları olub. “Omoniya”nın qapısını qoruyan Fabiano Freitas isə illərlə “Portu”, “Fənərbaxça” kimi klubların formasını geyib. Bəsdir, yoxsa yenə sayaq?.. Təkcə elə bu iki fakt “Araz-Naxçıvan”la “Omoniya” arasında böyük fərq olduğunu göstərir.

Azarkeşləri başa düşmək olar. Reallığı qəbul etmir, məsələyə fanatcasına yanaşırlar. Bəs özünə mütəxəssis deyənlər? Dünən çexiyalı hakim Ondrjey Berska final fitini səsləndirməmiş “Araz-Naxçıvan”a qarşı “hücum” başlayıb. Əslində, bu, dünənin, srağagünün hücumu deyil. Bir ildir yığılıb. Elmar Baxşıyevin komandası çempionatda üçüncü yeri tutmaqla çoxlarının planını pozmuşdu. Naxçıvan təmsilçisi üçlüyə düşməklə digər klubları orada görmək istəyənlərin gözündə düşmənə çevrilmişdi. “Aris” səddi də aşıldı və deməyə söz qalmadı. İndi isə ələ fürsət düşüb, döşə getsin. Ümumiyyətlə, kimə lazımdır “Araz-Naxçıvan”? Belə götürəndə 3-5 nəfərdən başqa heç kimə. Nə bazası var, nə stadionu, nə də avtobusu. Heç mətbuatla əməkdaşlıq da etmir...

İBRAHİM