Qurban Qurbanovdan qələbə şərhi

“Futbolçularımı təbrik edirəm. Texniki səhvlər çox oldu. Amma ümumən yaxşı diqqət, konsentrasiya var idi. Qələbə qazanmaq istəyirdilər. Futbolçularımın oyuna yanaşmasından razı qaldım. Bəzi futbolçular oyun ritmindən uzaq idilər. Amma 90 dəqiqə qalib gəlmək üçün xeyli güc sərf etdilər. Rəqibə uğurlar arzu edirəm”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Premyer Liqasının 34-cü turunda “Araz-Naxçıvan”a 2:0 hesabı ilə qalib gəldikləri oyundan sonra deyib.

Daha sonra mütəxəssis jurnalistlərin suallarını cavablandırıb:

- Yerli bazardan legioner transferi etmək istəyirsiniz?

- Yerli çempionatımızda yaxşı legionerlər var. Mənim diqqətimi cəlb edənlər də həmçinin. Amma əfsuslar olsun ki, o oyunçular öz komandalarının aparıcı futbolçularıdır. Ona görə bir o qədər buna ciddi yanaşmırıq. Bəzən inam olur, gözləyirsən. Sonda alınmayanda, gec olur. Daha çox kənardan oyunçu dəvət etmək istəyirik. Hər bir halda, daim hər bir legionerin oyununu nəzərimizdə saxlayırıq. Sadəcə klublar elə formalaşıb ki, klub rəhbərləri ilə münasibətimiz var, bəzən danışırıq və onlar deyir ki, bizim oyunçulara dəyməyin (gülür). Ona görə bu məsələ inandırıcı görünmür.

- Tahir Gözəl bildirib ki, kubokun final matçından sonra transferlərlə bağlı Qurban Qurbanovla danışacağıq. Bu haqda fikriniz necədir?

- Yekun olaraq ətraflı müzakirə edirik sonda. Amma ümumi iş rejimimizi saxlamırıq ki, mövsüm yekunlaşandan sonra başlayacağıq. Rahat proses deyil. Mütləq şəkildə işimizi, danışıqlarımızı davam etdiririk.

- Müqaviləsi bitən və danışıq apardığınız oyunçularla bağlı yenilik var? Hansısa futbolçu ilə razılıq əldə etmək mümkün olub?

- Hələ qəti heç nə yoxdur ki, kimləsə razılaşdıq. Amma yenə vaxtımız var. Diqqətimizi qarşıdakı oyunlara yönəltmişik.