“Zirə”nin müdafiəçisi: “Osihmenə qarşı oynamaq mənim üçün çətin olmadı”

“Zirə”nin müdafiəçisi Ange Mutsinzinin Futbolxeber.az saytına müsahibəsi

- Ölkə çempionatında ardıcıl 3 məğlubiyyətdən sonra “Sumqayıt”a qalib gəldiniz. 4:1 hesablı qələbəni necə şərh edərdiniz?

- Çox yaxşı oyun keçirdik. Qol vurmaq üçün xeyli şansımız oldu. Onlardan bəzilərini dəyərləndirə bilməsək də, 4 qol vurmağa müvəffəq olduq. Vacib 3 xal qazandıq. Nəticədən məmnunuq.

- “Sumqayıt” hesabı bərabərləşdirdikdən sonra psixoloji cəhətdən hər hansı bir gərginlik yaşamadınız?

- Xeyr, hər hansı bir gərginlik olmadı. Çünki oyunda üstün tərəf biz idik. Hesabda önə keçdikdən sonra da qol vurmaq üçün şanslarımız var idi. Ona görə də rəqib hesabı bərabərləşdirsə də, komandama inanırdım. Bilirdim ki, hesabda yenidən önə keçəcəyik.

- Bir gün əvvəl “Səbail”ə qalib gələn “Sabah” dördüncü pilləyə yüksəlməklə turnir cədvəlində “Zirə”ni geridə qoymuşdu. Bu məqam - yenidən dördüncü pilləyə qayıtmaq istəyi motivasiyanızı daha da artırmışdı?

- Biz digər komandaların çıxışına fikir vermirik. Yalnız öz oyunumuz barədə düşünürük və hər matça da qələbə üçün çıxırıq. “Sumqayıt”a qarşı gözəl futbol sərgilədik və layiqli qələbə qazandıq. İndi bunu qarşıdakı matçlarda da təkrarlamalıyıq.

- Buna qədər “Zirə” son 3 matçda məğlub olmuşdu. Komandanın bu uğursuz periodunu nə ilə əlaqələndirmək olar?

- Bu futboldur və hər komanda bu cür vəziyyətlə üzləşir. Biz də istəməzdik ki, ardıcıl məğlub olaq. Məşqlərdə tam gücümüzlə çalışırıq. Əlimizdən gələni edirik ki, qələbə qazanaq. İnanıram ki, bir də bu cür uğursuz halla üzləşmərik.

- Deyə bilərik ki, “Sumqayıt” üzərində qələbədən sonra “Zirə” “qara zolaq”dan çıxdı?

- Əlbəttə, buna inanırıq. Bunun üçün də əlimizdən gələni edəcəyik. Qarşıda 4 oyunumuz var. Həm kubok matçında, həm də ilin son 3 turunda qalib gəlmək üçün bütün gücümüzü meydanda sərf edəcəyik.

- Bir neçə gün əvvəl Ruanda millisinin heyətində Nigeriyaya qarşı oyunda qol vurdunuz. Təəssüratlarınız necədir?

- Mənim üçün bu, çox sevindirici haldır. Çünki millinin heyətində ilk dəfə idi fərqlənirdim. Lakin səfərdə Nigeriya üzərində qələbə qazanmağımıza baxmayaraq, mərhələ adlaya bilmədik. Afrika Millətlər Kubokunun seçmə mərhələsində mübarizəni dayandırdıq. Bu məqam təəssüf doğurur.

- Rəqibin heyətində “Milan”dan Çukvuze, “Bayer”dən Bonifase və ən əsası Osihmen kimi təhlükəli hücumçular var idi. Onlara qarşı oynamaq çətin olmadı?

- Əlbəttə, istər adını çəkdiyiniz digər hücumçular, istərsə də Osihmen çox güclü, təhlükəli futbolçulardır. Amma komandala olaraq biz yaxşı mübarizə apardıq. Ona görə də Osihmen və digərlərinə qarşı oynamaq mənim üçün çətin olmadı.

İbrahim Cəfərov