“Atletiko”dan “We remember Xocalı” ifadəsi

“Bakı” Futbol Klubunun prezidenti Hafiz Məmmədovun Azərbaycanın tanıdılması yönündə fəaliyyəti getdikcə daha çox sahələri əhatə edir. Futbolxeber.az-ın məlumatına görə, Hafiz bəyin Madrid “Atletiko”su və “Lans”ın formasına həkk etdirdiyi “Land of Fire Azerbaijan” (Odlar Yurdu Azərbaycan) ifadəsi ölkəmizin həqiqətlərini daha geniş üfüqlərdə tanıtdırmağa imkan verir. Bununla yanaşı, Azərbaycanın tarixən məruz qaldığı faciələr də imkan düşdükcə daha geniş şəkildə dünya ictimaiyyətinin diqqətinə çatdırılır. Bunun məntiqi nəticəsi kimi, ölkəmizin təbliğinə hər yöndə dəstək verən Madrid “Atletiko”su İspaniya La Liqasında keçirdiyi son oyunda daha bir yeniliyə imza atıb. Belə ki, Dieqo Simeonenin yetirmələrinin Madrid “Real”ı ilə keçirdiyi görüş zamanı (2:2) reklam lövhələrində “We remember Xocalı” (Biz Xocalını unutmadıq) sözləri nümayiş etdirilib. Bununla Madrid təmsilçisi Azərbaycanın dünyadakı haqq səsinə bir daha dəstək vermiş olub.