Özbəkistan prezidenti milli komandanı təltif etdi

Özbəkistan prezidenti Şavkat Mirziyoyev milli komandanın futbolçularını və baş məşqçisini DÇ-2026-nın final mərhələsinə yüksəldiklərinə görə “Özbəkistanın fəxri” adı ilə təltif edib.

Futbolxeber.az-ın məlumatına görə, müvafiq sərəncam dövlət başçısının rəsmi saytında dərc olunub.

Komandanın futbolçuları və baş məşqçisi tarixi nailiyyətə görə dövlət mükafatına layiq görülüblər. Özbəkistan millisi tarixində ilk dəfə olaraq dünya çempionatının final mərhələsinə vəsiqə qazanır.

Bundan başqa, Özbəkistan Futbol Assosiasiyasının birinci vitse-prezidenti Ravşan İrmatov “Fədakar xidmətə görə”, komandanın məşqçilər korpusunun üzvləri isə “Dostluq” ordeni ilə təltif edilib.

Xatırladaq ki, Özbəkistanın BƏƏ ilə səfər matçı (0:0) həlledici olub və nəticədə Timur Kapadzenin komandası dünya çempionatına vəsiqəni təmin edib.

Dünya çempionatının final mərhələsi 2026-cı ilin 11 iyun - 19 iyul tarixlərində 48 komandanın iştirakı ilə ABŞ, Meksika və Kanadada keçiriləcək.