Joze Maurinyo: "Bu, karyeramdakı ən uğursuz mövsümdür"

"Real"ın baş məşqçisi Joze Maurinyo Kral Kubokunun finalında "Atletiko"ya 1:2 hesabı ilə uduzduqları görüşü şərh edib. Futbolxeber.az-ın məlumatına görə, Maurinyo cari mövsümü karyerasındakı ən uğursuz mövsüm hesab edib: "Atletiko" qələbəyə layiq deyildi. Amma onlar qələbə qazandılar və bu münasibətlə rəqibi təbrik edirəm. Uzun illərdi futbolun içindəyəm və hər nə qədər güclü məşqçi olmasına baxmayaraq, hər il uğur qazanan mütəxəssis tanımıram. Bu, karyeramdakı ən pis mövsümdür. Mövsüm ərzində cəmi 1 mükafat qazandıq ki, bu da nə "Real"ı, nə də məni qane edir. Mövsüm bizim üçün çox uğursuz alındı. İspaniya kubokunda finalda, Çempionlar Liqasında isə yarımfinalda uduzduq. La Liqada ikinci yeri tutduq və yalnız ölkə superkubokunu qazandıq. Bəlkə də kimsə bu nəticələri özü üçün uğurlu hesab edə bilər, amma mən belə düşünmürəm".

Portuqaliyalı mütəxəssis gələcək karyerasından da söz açıb: "Real"la hələlik daha 3 illik müqaviləm var. Klub prezidenti ilə gələcək karyeramı hələ müzakirə etməmişəm. Mətbuatda gündə yerimə 1 məşqçi gətirir ki, bunu da normal qarşılayıram. Adım "Çelsi" və digər komandalarla da yanaşı çəkilir. Amma mən səmimi olmağa söz verirəm. Nə vaxt ki, Pereslə danışıqlar masasına əyləşəcəyik, o zaman da gələcəyimlə bağlı qərarımı rəsmən ictimaiyyətə açıqlayacağam".