“Səbail”in “avtoş”u

Dünən yolum Bakı Olimpiya Stadionuna düşmüşdü. BOS-un girişindəki şlaqbaumun qarşısında arenanın ərazisinə daxil olmağa çalışan avtomobillərə nəzarət əvvəlkindən daha güclü idi. Əslində, BOS-a giriş hər zaman çətin olub, amma budəfəki nəzarət daha ciddi idi. Maşınla arenaya yaxınlaşanlar qarşılaşdıqların mənzərədən təəccüblənsələr də, idman mətbuatını yaxından izləyənlər bu nəzarətin səbəbini çox yaxşı bilirdilər.

2 gün əvvəl “Səbail”in üzvü Eltun Yaqublunun şəxsi avtomobili ilə Bakı Olimpiya Stadionunda futbolçuların meydana çıxması üçün nəzərdə tutulan tunelə qədər getməsi və həmin kadların əks olunduğu videonun mətbuata çıxması ciddi narazılıqla qarşılanıb. Aydın məsələdir ki, xoşagəlməz halın yaşanmasında stadionun mühafizəçilərin də günahı var. Amma birmənalı şəkildə əsas günahkar futbolçudur. Bəziləri bəyənməsə də, “qılınc müsəlman” ifadəsi əsl bizlikdi. Biz bir yerdə azca özümüzə qarşı xoş münasibət gördüksə, dərhal “çıxıb otururuq bizə xoş münasibət göstərənin başında”. BOS-un mühafizəçiləri, yaxud rəhbərliyi arenanın ərazisinə daxil olan hər maşını güdə bilməzlər. Futbolçuya stadion ərazisinə maşınla daxil olmaq icazəsi verilibsə, bu o demək deyil ki, o, avtomobili ilə istədiyini etməlidir.  

Məlum məsələdir ki, BOS-a yalnız xüsusi buraxılışı olan maşınlar daxil ola bilir. Meydançanın kənarına isə ümumiyyətlə, avtomobillə getmək qadağandır. Bu halda Yaqublunun sözün hər iki mənasında bu qədər irəli getməsinin səbəbi nə idi? Mətbuatda yayımlanan həmin 14 saniyəlik videoya bir neçə dəfə baxdım. Əslində, baxılası bir şey də yoxdu. Bu hərəkətə bilmirsən nə deyəsən, özündənrazılıq, ulduz xəstəliyi, yaxud nə?

Təəssüf ki, özündənrazılıq, ulduz xəstəliyinə tutulmaq bir çox azərbaycanlı futbolçunun evini yıxıb. İnsan kimi Eltun Yaqublu barədə bir söz deyə bilmərəm. Şəxsi tanışlığımız yoxdu. Amma futbolçu Eltun Yaqublunun nə özündən razı olmağa, nə də ulduz xəstəliyinə tutulmağa haqqı var. Axı futbolçu kimi nə edib, hansı titulu qazanıb? Bəlkə uzun illər millidə oynayıb?

Cari mövsüm Azərbaycan Premyer Liqasında “Səbail” artıq 3 oyun keçirib və Yaqublu bu görüşlərdən yalnız 1-də, o da 11 dəqiqə meydanda olub. O da “Sumqayıt”la səfər oyununda, hesab 3:0 komandasının xeyrinə olanda. Həmin anda “Səbail” qələbəni təmin etməsəydi, inanmıram ki Yaqublu oynamaq şansı qazanardı. Yəqin ki, “Zirə” və “Qarabağ”la oyunlarda olduğu kimi ehtiyat oyunçular skamyasında qalardı. Eltun Yaqublu həmin 11 dəqiqəyə görə belə şou göstərir? Azdan-çoxdan dünya mətbuatını izləyirik. Kriştiano Ronaldonun, Lionel Messinin belə “oyun çıxartdığını” görmüsüz? Xeyr. Onlar oyunu lazım olan yerdə çıxardırlar, meydanda. Yaxşı olardı ki, azərbaycanlı futbolçular da meydandakı çıxışları ilə gündəmə gəlsinlər, bu cür hərəkətləri ilə yox.

Üstəlik, bu, Eltunun oyunu ilə yox, avtomobilə ilə gündəmə gəldiyi ilk hadisə deyil. Ötən ilin noyabrında Yaqublu komanda yoldaşı Ağabala Ramazanovun toyundan sonra da "avtoş"luğu ilə gündəm olmuşdu.

Yaqublunun son hərəkəti komanda yoldaşlarını da pis vəziyyətə salıb. Eltunun Rafet El Romanın mahnısının sədaları altında BOS-dakı “şou”sundan sonra stadion rəhbərliyi haqlı olaraq qərar çıxarıb ki, futbolçular bundan sonra stadionda şəxsi nəqliyyat vasitəsilə deyil, yalnız komanda avtobusu ilə daxil olacaqlar. Burda deyirlər ki, “sənə lazım idi bu?"