Zaur Axundov: “Kütləvilik bizi qane etmir”

Azərbaycan Futzal Federasiyasının prezidenti Zaur Axundov DÇ-2024-ün əsas mərhələsində millimizin Yunanıstanı 5:2 hesabı ilə məğlub etdiyi oyundan sonra brifinq keçirib.

Futbolxeber.az saytının əməkdaşının da suallarını cavablandıran Z.Axundov əvvəlcə yunanlarla qarşılaşma barədə danışıb:

- Bu nəticəyə görə sevinirik. Amma hələ mübarizə irəlidədir. Elit-raunda hazırlaşacağıq. Görüləsi işlər çoxdur. Bu gün millinin çıxışından tam razı qalmadım. Həm futbolda, həm də futzalda arxayınlıq olmaz. Amma bu görüşdə oldu. Yəqin ki, bu səbəbdən komanda ilə söhbət edəcəyik. 

- Yunanıstanı ilk görüşdə səfərdə 7:0 hesabı ilə məğlub etmişdik. Məhz bu amilin komandada arxayınçılıq yaratdığını düşünürsünüz?

- Əlbəttə. Hər şey məhz ilk oyundakı böyükhesablı qələbədən irəli gəlir. Bu yöndə narazılığımı komandaya bildirəcəyəm. 

- Qrupdakı son görüşdə millimiz səfərdə Polşanın qonağı olacaq. Bu oyunda həm də qrup liderinin adına aydınlıq gələcək...

- Yunanıstanla qarşılaşmadan əvvəl komanda ilə görüşmüşdüm. Hər iki oyunla bağlı tapşırıqlar verilib. Ölüb-dirim matçı olacaq. Amma lazımi nəticəni qazanıb, elit-raunda qrup birincisi kimi yüksəlməliyik.

- Polşadakı oyunun nəticəsindən asılı olmayaraq, millimiz artıq Dünya çempionatının elit-raunduna vəsiqəni təmin edib. Qarşıdakı hədəflər nədir? 

- Dünya çempionatının əsas mərhələsində vəsiqə qazanmaq. Başqa hədəfimiz yoxdur. 

- Martın 7-də AFFA İcraiyyə Komitəsinin iclasında və Konfransda iştirak edəcəksiniz. Konfransda futzalla bağlı vacib məsələlər müzakirə olunacaq. Bu barədə nə deyə bilərsiniz? 

- Bu, həm hesabat xarakteri daşıyacaq, həm də bəzi təkliflər irəli sürəcəyik. Yəqin ki, mətbuata bu barədə məlumat veriləcək. Təkliflər futzalın daha da inkişaf etdirilməsi və gənclərin yetişdirilməsi, bu idman növünə cəlb olunması ilə bağlıdır. İcraiyyə Komitəsinin iclasında bu məsələləri qaldıracağıq. 

- Demək olar ki, Azərbaycan futzalı löklü dəyişikliklər ərəfəsindədir?

- Təbii ki. Gənclərin futzala cəlb edilməsi əsas məsələ olacaq. 

- Düşünürsünüz ki, futzalda kütləvilik azalıb?

- Fakt budur ki, artmayıb. Bizi qane edən səviyyədə deyil. Getdikcə çətinlik çəkirik.  İdmançılar 15-16, bəlkə də 12-13 yaşından futzala cəlb edilməlidirlər.

İbrahim CƏFƏROV