1 Seyxana dəyməyən 27 legioner

Dünən keçirilən 2 oyunla Azərbaycan Premyer Liqasında 3-cü tur start götürdü. “Qəbələ” “Şamaxı”nı, adı Bakının, dadı Sumqayıtın olan “Şəfa” isə adından başqa İmişliyə heç bir bağlılığı olmayan “İmişli”ni qəbul elədi. 4 komanda 180 dəqiqəyə bir qol vurdu. 4 komandanın start heyətində 27 legioner yer almışdı. Amma 4 komandanın payına düşən bir qolu yerli futbolçu vurdu. Hansı ki, ötən mövsüm I Liqada çıxış edirdi. 27 legionerin 27-sindən də qol gözləmirik. Amma bu əcnəbilər bir dərdə dərman deyillərsə, o qədər legioneri yığmağın mənası nədir? Ondansa Seyxan kimi yerli futbolçulara şans vermək daha faydalı olmazmı? Başa düşürəm, yeni nəsil idman funksionerlərinin işi-gücü ancaq heyətə mümkün qədər daha çox legioner cəlb etməkdir. Əfran İsmayılov necə demişdi? “Azərbaycanlı futbolçunun istədiyi məbləğə iki legioner gətirərəm”. Gətirdiniz, Əfran bəy, gətirdiniz. Özü də 10-nu birdən...

Qəribəsi odur ki, bu 4 klubun 4-ü də – istər “Qəbələ”, istər “Şamaxı”, istər “İmişli”, istər “Şəfa” – hamısının yeganə məqsədi Premyer Liqada qalmaqdır. Bu halda N qədər legionerə nə ehtiyac var? İştirak ərizəsinə diqqət yetirək. “Şəfa”, “Qəbələ”, “Şamaxı”nın hər biri 10, “İmişli” isə 9 legioner sifariş edib. Hələ transfer pəncərəsi bağlanmayıb və bu sayın artacağı istisna deyil. Özü də gətirilən legionerlərin əksəriyyətinin səviyyəsi yerlilərdən üstün deyilsə, bu qədər əcnəbi sevgisi nəyə gərəkdir?

AFFA legioner limitini ləğv edəndə adını qoydular ki, guya bu, Azərbaycan futbolunun inkişafına xidmət edəcək. Guya ki, limitin ləğvindən sonra bütün azərbaycanlı futbolçular legioner həyatı yaşamaq üçün ölkə xaricinə üz tutacaqlar. Ay tutdular a...

Əvəzində yeni nəsil idman funksionerləri dövlətin klublara ayırdığı 2.5 milyon manatın böyük hissəsini Azərbaycan futboluna qara qəpik də xeyri olmayan legionerlərə xərcləməyə başladılar. Kimə lazımdır axı "Şəfa", "İmişli" kimi klublar? Onların gətirdikləri əcnəblərin Azərbaycan futboluna nə faydaları var? Təbii ki, bütün bu sualların cavabı “heç nə”dən başqa heç nə deyil. Sadəcə dövlətin pullarına heyif, çox heyif...

İBRAHİM