Kölgədə qalmaq

Feysbukun müsbət cəhətlərindən biri də illər öncəki paylaşımları xatırlatmasıdır. Dünən qarşıma 2025-ci ilin 9 aprelindən maraqlı bir paylaşım çıxdı. Belə ki, 1 il əvvəl AFFA-nın baş katibi Cahangir Fərəcullayev Fransada işgüzar səfərdə olub. Fərəcullayev FIFA-nın Parisdə yerləşən ofisində bir sıra görüşlər keçirib. O, tanışlıq çərçivəsində ali futbol qurumunun Avropa üzrə regional direktoru, AFFA-nın sabiq baş katibi Elxan Məmmədovla da görüşüb. Həmin vaxt Cahangir Fərəcullayev vəzifəyə təyin olunmuşdu. İctimaiyyətdə onun haqqında dolğun məlumat yox idi.

Geridə qalan bir il ərzində isə AFFA-nın yeni baş katibi barədə futbol cameəsində artıq müəyyən fikir formalaşıb. Açıq deyim ki, mən Cahangir bəyi yaxından tanımıram. AFFA-nın son Hesabat-Konfransında ayaqüstü 15-20 saniyəlik söhbətimiz olub, vəssəlam. Haqqında ətrafımdakılardan “pis insan deyil”, “yaxşı oğlandır” və s. kimi fikirlər eşitmişəm. Bu fikirləri səsləndirənlərin səmimiyyətinə inandığım üçün düşünürəm ki, Cahangir bəy həqiqətən də yaxşı insandır. Amma ruslar demiş, “хороший парень - это не профессия”. Yəni yaxşı insan olmaq hələ yaxşı baş katib olmaq demək deyil.

Məncə, Cahangir bəy ümumiyyətlə olduğu vəzifəni tutmaq üçün hələ tam bişməyib. Birincisi, daha əvvəl də bu haqda yazmışam. Cahangir bəyin komandası çox zəifdir. Bəzi məsələlər var ki, ətrafındakı (komandasındakı) insanlar asanlıqla yolunu qoymalı olsalar da, bunu edə bilmirlər, məsələ şişir və belədə baş katibə qarşı yönələn tənqidlərin sayı artır.

İkincisi, kobud da çıxsa, kimə gəldi vəzifə vermək, hər hansı bir iş tapşırmaq doğru deyil. Bilmirəm, bu, Cahangir bəyin ideyasıdır, ya ətrafındakıların, amma keçmiş AFFA rəhbərliyini tənqid ediblər deyə bəzi veteran futbolçuların, sabiq rəsmilərin əksəriyyətinə vəzifə, kabinet, avtomobil vermək futbolun inkişafı demək deyil. Bəli, bu gün həmin şəxslər AFFA-nı tənqid etmirlər, sizin, assosiasiyanın şəninə təriflər yağdırırlar. Lakin bu, sabun köpüyündən başqa bir şey deyil. İnanın ki, bu sözlər vaxtı ilə Rövnəq Abdullayevə də deyilib, Elxan Məmmədova da, Sərxan Hacıyevə də. Bu gün sizin dostlarınız hər uğursuzluğu Rövnəq Abdullayevin, Elşad Nəsirovun, Elxan Məmmədovun ayağına yazırlar, lakin vaxt gələcək o siyahı genişlənəcək. Bax onda başa düşəcəksiniz ki, insanlara layiq olduğundan daha artıq dəyər verməyə dəyməz...

Vaxtı ilə Xaqani Məmmədovu bəyənmirdik, indi Rəhim Həsənovu görüb ötən günlərə şükür edirik...

Vaxtı ilə “hakimlər “Neftçi”yə, “Qarabağ”a dəstək olur” deyirdik, indi “Sabah”a baxıb, “indikinin yanında əvvəlkilər toya getməli idi” deyirik...

Vaxtı ilə İsveç, Slovakiya, Şimali Makedoniya, Qazaxıstan üzərində qələbələrə ağız büzürdük, indi isə Sent Lüsiya (ümid edirəm ölkənin adını düz yazdım) üzərində qələbəni bayram edirik...

Cahangir bəy, sizcə, obyektivliyini itirməyənlərin, şəxsi marağını güdməyənlərin fikrincə, bu sırada növbəti kimlərdir?..

İBRAHİM