“Sabah”ı dayandırmaq çətindir, amma mümkünsüz deyil”

“Araz-Naxçıvan”ın müdafiəçisi Bəxtiyar Həsənalızadənin Futbolxeber.az saytına müsahibəsi

- Azərbaycan Premyer Liqasının 26-cı turunda “Sabah”a uduzdunuz. Hesabda iki dəfə öndə olduğunuz matçda xal qazanmağınız üçün nə çatışmadı?

- Oyunumuz ümumilikdə pis alınmadı. Liderə qarşı oynayırdıq. Yaxşı mübarizə apardıq. Buraxdığımız səhvlərdən uduzduq. Bəzi epizodlarda keyfiyyət fərqi hiss olunurdu. İki penalti epizodu oldu. Təkrara tam baxmamışam. Ona görə də epizodlar barədə dəqiq fikir bildirə bilməyəcəm.

- Uduzmağınıza əsas səbəb rəqib futbolçular oldu, yoxsa hakimlər?

- Məğlubiyyəti hakimlərin üstünə yıxmazdım. Amma dediyim kimi, epizodlara baxmamışam. Matçın gedişində də hakimə yaxınlaşıb etirazımızı bildirirdik, o isə nələrsə izah edirdi. Lakin biz epizodu görmədiyimiz üçün dəqiq söz deyə bilmirdik.

- Həqiqətən “Sabah”ı dayandırmaq çətindir?

- Çətindir, amma mümkünsüz deyil. Biz buna nail olmağa yaxın idik. 2 dəfə hesabda önə keçdik. Təəssüf ki, üstünlüyü əldən verdik. Rəqib xırda səhvləri bağışlamır.

- Artıq turnir cədvəlində 6-cı yerdəsiniz...

- Hələ heç nə bitməyib. Son oyuna kimi mübarizə aparacağıq. Artıq rəqibə baxmayacağıq, hər bir matç bizim üçün finala bərabərdir. Xal itirmək şansımız yoxdur.

- Növbəti turda “Neftçi” ilə qarşılaşacaqsınız. “Ağ-qaralar”ı nədə üstələyə bilərsiniz?

- Mübarizə aparmasaq, uğur qazanmaq mümkün deyil. Bəli, “Neftçi” keyfiyyətli komandadır. Lakin hər top üçün mübarizə aparmaq lazımdır. “Sabah”la matçda mübarizə apardıq. Sadəcə fərdi səhvlər, penalti epizodları məğlubiyyətə gətirib çıxardı. İstəməzdik belə səhvlərə yol verək.  

- Səfərdə oynadığınızı nəzərə alsaq, “Neftçi” ilə matçda 1 xal “Araz-Naxçıvan”ı qane edəcək?

- Qətiyyən yox. Qələbədən başqa yolumuz yoxdur. 3 xal bizə hava-su kimi lazımdır. Təbii ki, “Neftçi” də qələbə qazanmaq istəyəcək. Biz də mübarizə aparacağıq. Kimin güclü olduğu isə meydanda görünəcək.