Koxalski Qubada meydana niyə çıxmayıb: zədə, yoxsa..?

“Qarabağ” Azərbaycan Premyer Liqasının XX turunda “İmişli”yə qarşı keçirilən matça ciddi itki ilə çıxıb. Belə ki, Ağdam klubunun əsas qapıçısı Mateuş Koxalskinin adı Qubada keçirilən görüşün iştirak ərizəsinə daxil edilməyib. Əsas heyətdə Fabian Buntiç yer alıb, ehtiyatda isə yalnız Amin Ramazanov var.

“Qarabağ”ın mətbuat xidmətinin rəhbəri Anar Hacıyev Futbolxeber.az saytının Qubaya ezam olunmuş əməkdaşına açıqlamasında bildirib ki, polşalı qolkiperin ayağında yüngül ağrı var. Bu səbəbdən də onun adı matçın protokoluna daxil edilməyib. Koxalski heyətdə yer almasa da, komanda ilə birgə Qubaya yollanıb.

Xatırladaq ki, bu günlərdə Mateuş Koxalskinin qış transfer pəncərəsində “Qarabağ”dan ayrılmaq istədiyi məlum olub. Polşalı legioner ölkəsinin mətbuatına müsahibəsində klub rəhbərliyinin bu keçidə icazə vermədiyini bildirmişdi.