Elnur Abdullayev: “Çempionluğa doğru önəmli addım atdıq”

“Bura gələndə məqsəd birinci liqaya yüksəlmək və çempionluq idi. İlk vəzifəni yerinə yetirmişik, bu gün də çempionluğa doğru önəmli addım atdıq. Düzdür, qızıl medalları tam təmin etməmişik. İnanıram ki, bunun da öhdəsindən gələcəyik”.

Futbolxeber.az saytının məlumatına görə, bu sözləri II Liqada mübarizə aparan “Şahdağ Qusar”ın baş məşqçisi Elnur Abdullayev 24-cü turda “Şəfa”ya qarşı keçirilən oyundan (0:0) sonra təşkil olunan mətbuat konfransında deyib.

O, stadiondakı ab-havadan da söz açıb: “Bu gün əla atmosfer var idi. Mən futbolçu vaxtı "Xəzər Lənkəran"da belə ab-havada oynamışam, azarkeşin dəstəyinin nə olduğunu bilirəm. Tərəfdarlarımıza minnətdaram”.

Gənc məşqçi futbolçularına göstərdikləri mübarizəyə görə təşəkkür edib: “Bu gün güclü rəqiblə qarşılaşdıq. İstək mənim üçün önəmlidir. Komandam da çox istəkli idi və onlara təşəkkür edirəm”.

E.Abdullayev yeni mövsümlə bağlı dəqiq söz deməkdə çətinlik çəkib: “Birinci Liqa ilə bağlı planlarımız barədə hələ heç nə deyə bilmərəm. Çox istərdim ki, 1-ci Liqada ev oyunlarımızı Qusarda keçirək. Çünki belə azarkeşin qarşısında oynamaq qarşılaşmaya 1:0 öndə başlamaq deməkdir. Amma stadionla bağlı konkret nəsə deyə bilməyəcəyəm. Məlumatım olsaydı, cavablandırardı bu sualı”.