Yuri Matias: “Atmosfer əladır”

“Bildiyiniz kimi, yanvarın 3-dən təlim-məşq toplanışındayıq. Komanda bir araya gəlib. Çox gözəl hazırlıq prosesi keçirik. Komandada əhval-ruhiyyə yaxşıdır. Baş məşqçinin bizdən tələbləri daha çox fiziki cəhətdən lazımi formada olmağımızdır. Ümumi baxanda, futbolçular bir-birinə daha da adaptasiya olur. Bir-birimizlə zarafatlaşırıq. Atmosfer əladır”.

Futbolxeber.az saytının məlumatına görə, bu sözləri "Neftçi"nin futbolçusu Yuri Matias klubun mətbuat xidmətinə açıqlamasında paytaxt təmsilçisinin hazırlıq prosesi barədə danışarkən deyib.

29 yaşlı müdafiəçi təlim-məşq toplanışının ona və komanda yoldaşlarına yaxşı təsir etdiyini bildirib: "Əlbəttə ki, burada keçirdiyimiz məşqlər bizə yaxşı təsir edir. Təkcə fiziki cəhətdən yox, mental baxımdan da. Çünki futbolçular daha çox birlikdə vaxt keçirirlər. Bir-birimizi daha yaxından tanımağa başlayırıq. Bu məqamlar bizə oyunlarda kömək olacaq. Hər birimiz əlimizdən gələnin ən yaxşısını edəcəyik ki, müsbət nəticələr qazanaq".

Y.Matias Azərbaycan Premyer Liqasının 19-cu turunda "Sabah"a qarşı keçirəcəkləri matç barədə danışıb: "Qarşıda bizi "Sabah"la oyun gözləyir. Bu matça çox yaxşı hazırlaşırıq. Düşünürəm ki, bu oyuna tam hazır olacağıq. Qələbə qazanmaq üçün əlimizdən gələni edəcəyik".

Qeyd edək ki, braziliyalı futbolçu cari mövsüm Azərbaycan Premyer Liqasında 15 oyuna çıxıb, 2 qol vurub və 1 qolun ötürməsini verib.