Şahin Diniyevdən qələbə şərhi

“Bu gün oyun tam diqqətimizlə keçdi. Sadəcə standart vəziyyətlərdə problemimiz olurdu. Onda da qapıçı və müdafiəçilərimiz etibarlı oynadı. Topa nəzarət edərək qol vəziyyətləri yarada bildik. “Qara zolaq”dan çıxmaq məni sevindirir. Yolumuza davam edəcəyik”.

Futbolxeber.az saytının məlumatına görə, bu sözləri "Səbail"in baş məşqçisi Şahin Diniyev Azərbaycan Premyer Liqasının 9-cu turunda doğma meydanda "Şamaxı"nı 2:0 hesabı ilə məğlub etdikləri matçdan sonra keçirilən mətbuat konfransında deyib.

Təcrübəli mütəxəssis matçın gedişində hakimlərə etiraz etməsinin səbəbini belə izah edib: “Biz emosiyalara qapılmışıq. Demirəm ki, etdiyim hərəkətlərin hamısı düzdür. Futbol emosiyalar oyunudur. Sakit durub oyuna baxsan, alınmayacaq. Heç bir hakimlə intriqam yoxdur. Əliyar Ağayev oyunu normal idarə etdi”.

“Neftçi”nin dünənki məğlubiyyəti komandanızın oyuna köklənməsinə necə təsir etdi?” sualını Diniyev belə cavablandırıb: “Çox təsir etdi. "Kəpəz" qalib gəlməklə xal fərqini 1-ə endirdi. Futbolçularda təzyiq olur. Amma bugünkü qələbə bizi sonuncu yerdən bir az uzaqlaşdırdı. Amma bu, heç nə demək deyil. 3 xallıq çempionatda hər şey ola bilər. "Neftçi" bu situasiyadan çıxacaq. Bu, görünəndir. "Kəpəz"in qələbəsi bizi bir az da ruhlandırdı. Arxamızda nəfəs hiss elədik. Bu, bizim üçün çox böyük motivasiya verdi”.