“Dinamo” Berdıyevlə vidalaşdı: “Yeni klubunuzda sizə uğurlar arzulayırıq”

Mahaçqala “Dinamo”su buna qədər klubda prezidentin müşaviri postunu tutan Kurban Berdıyevlə vidalaşıb.

Futbolxeber.az saytının məlumatına görə, klubun mətbuat xidmətinin yaydığı açıqlamada “Turan Tovuz”un baş məşqçisi təyin olunan 71 yaşlı mütəxəssisə yeni iş yerində uğurlar arzulanıb:

“Biz sizə böyük təşəkkürümüzü bildiririk, Kurban Bekieviç! Siz “Dinamo”ya tarixində ilk dəfə elit diviziona yüksəlməkdə kömək oldunuz. Siz bizim oyunçularımızı inkişaf etdirdiniz, onlara çox şey öyrətdiniz. Əks halda uğur qazanmaq mümkün deyildi.  

Ayrıca respublikanın uşaq-gənclər futbolunun inkişafında gördüyünüz işlər üçün sizə minnətdarıq. Yeni klubunuzda sizə uğurlar arzulayırıq”.

Xatırladaq ki, Berdıyev dünən “Turan Tovuz”la 2+1 illik müqavilə imzalayıb.