Rahid Əmirquliyev çempion oğlu barədə: “Atasından da güclü futbolçu olacaq”

“Maraqlı oyun keçdi. Final çox gözəl təşkil olunmuşdu”.

Futbolxeber.az saytına açıqlamasında bu sözləri millimizin sabiq üzvü Rahid Əmirquliyev U-13 Liqasının finalı barədə danışarkən deyib.

Veteran futbolçu “Qarabağ”ın “Neftçi”ni 1:0 hesabı ilə məğub etdiyi həlledici qarşılaşmanı belə şərh edib: “Neftçi” də çempionluğa layiq idi. Onlar da gözəl oyun sərgilədilər. Ümumiyyətlə, eyni səviyyəli komandaların qarşılaşmasını izlədik. Hər iki tərəf gözəl çıxış etdi. Yekunda “Qarabağ” qol vuraraq qalib gəldi. Çempionluq münasibəti ilə onları təbrik edirəm. Nə qədər belə maraqlı çempionatlar təşkil edilsə, futbolumuz bir o qədər inkişaf edər”.

Rahid Əmirquliyev “Qarabağ”ın U-13 komandasının heyətində çempionluq sevinci yaşayan oğlu Ramilin çıxışına belə qiymət verib: “Hələ uşaqdılar. İndidən nəsə qəti fikir bildirmək tezdir. Lakin görsənir ki, perspektivi var. İnşallah atasından da güclü futbolçu olacaq”.

Fərəc ASLANOV