"Bizə heç kim nəsə dəyə bilməz"

“Futbolçularımı təbrik edirəm. Həftə içində onlar, əsasən də legionerlər canfəşanlıq göstərirdilər, azarkeşləri stadiona dəvət edirdilər. Bu gün yaxşı dəstək var idi. Zeynəb Məmmədyarova, İlham Zəkiyev, Rafael Ağayev, Murad Arif, onların hər birinə təşəkkür edirəm. Bizim o cür dostlarımız var. Məncə, bizə heç kim dəyə bilməz. Onlar yanımızda olanda başqa motivasiya verir”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov Azərbaycan Premyer Liqasının 34-cü turunda “Səbail”i 2:1 hesabı ilə məğlub etdikləri oyundan sonra deyib.

Təcrübəli mütəxəssis komandasının qələbəsini belə şərh edib: “Oyuna gəldikdə, futbolçular psixoloji olaraq çox yüklənib. Bu, yaxşı deyil. Avropada olmaq istəyirlər. Bunun qarşısını ala bilmərik. Bəlkə də təyziq bu cür oynamağa səbəb olur”.

Abasov həmkarlı Şahin Diniyevin "Səbail"in daha yaxşı oynadığını fikrinə belə münasibət bildirib: “Artıq "Səbail"lə oyunlardan sonra dördüncü mətbuat konfransıdır ki, eyni sual verilir. Amma dördüncü dəfə də biz uduruq. Şahin müəllim mənim məşqçim olub. Belə görübsə, haqq qazandırıram. Doğrudan da "Səbail" yaxşı oynadı”.

O, matçın gedişində kənarda sakit görünməsinin səbəbini izah edib: “Səbəb futbolçuları təzyiqə salmamaq idi. Mən də öz təzyiqimlə onları yükləmək istəmirdim. Həmin ərəfə deyil ki, mən coşum, hirslənim. İstəmədən özümü cilovlamışam”.

O, “İkinci yeri tutmaq üçün "Sumqayıt"a nə mane ola bilər?” sualını belə cavablandırıb: “Məni qorxudan futbolçuların üzərində olan təzyiqdir. Düşünürəm ki, qol buraxsaq, nələr baş verə bilər. Sına da bilərik. Şükürlər olsun ilk qolu buraxmırıq”.

S.Abasov qeyd edib ki, hazırkı büdcə, heyət və rəqabət qarşılığında “Sumqayıt” ikinci yeri tuta bilsə, bu, “Neftçi”dəki çempionluqdan sonra məşqçi karyerasında ən böyük uğur olacaq: “Amma futbolçularım olmasaydı, mən bunu əsla edə bilməzdim”.