Samir Abasov: “Epizodları qola çevirə bilmədik”

"Yorğunluq hiss olunurdu. Bilirdik ki, bu əziyyəti çəkəcəyik. İlk dəqiqələrdə top itkiləri oldu".

Futbolxeber.az saytının məlumatına görə, bu sözləri "Sumqayıt"ın baş məşqçisi Samir Abasov Azərbaycan Premyer Liqasının 11-ci turunda bu gün "Qəbələ" ilə keçirilən oyundan sonra mətbuat konfrnasında deyib.

O, qolsuz başa çatan matçı belə şərh edib: "İkinci yarıda meydanda tam fərqli "Sumqayıt" gördük. Əldə etdiyimiz epizodları qola çevirə bilmədik. Lakin fasilədən sonra yaxşı oynadıq, udmaq istəyən komanda görünürdü. Demirəm ki, ilk yarıda da belə deyildi. Sadəcə çox şey alınmırdı. Bu da yorğunluqla bağlı idi. "Sabah"la iki oyunda həddən artıq enerji vermişdik. Bu gün də oynadıq, uduzmadıq. Qarşıdakı matçlara köklənəcəyik. Yorğunluğu bir həftədə atarıq və qələbə qazanarıq".

S.Abasov komandasının son nöqtəni qoya bilməməsi ilə bağlı da danışıb: "Son nöqtənin qoyulmaması sırf futbolçunun keyfiyyəti ilə bağlıdır. Keyfiyyətlərini ortaya qoya bilmədilər. Yorğunluq həqiqətən hiss edilirdi. "Qəbələ" açıq futbol oynayır. Bunu bilirdik. Qalib gəlmək emosiyası artmışdı. İstədik qalib gələk".