I və II Liqada ilk turun püşkü atıldı

Bu gün futbol üzrə Azərbaycan I və II Liqada püşkatma mərasimi keçirilib.

Futbolxeber.az saytının məlumatına görə, AFFA-nın inzibati binasında təşkil olunan tədbirdə Peşəkar Futbol Liqasının texniki idman direktoru Elgiz Abbasov reqlament barədə danışıb.

O qeyd edib ki, II Liqada sonuncu yeri tutacaq komanda Region Liqasına düşəcək. Sondan əvvəlki yerin sahibi isə liqada qalmaq üçün Region Liqasının qalibi ilə pley-offda mübarizə aparacaq. İkinci Liqada 14 komanda mübarizə aparacaq, yarış 2 dövrədən ibarət olacaq.

E.Abbasov qeyd edib ki, I Liqada 10 komanda mübarizə aparacaq. Yarış 3 dövrədən ibarət olacaq. İlk dövrədə meydan sahibi olan komandalar, III dövrədə də eyni rəqibini doğma divarlar arasında qəbul edəcək. Birinci Liqada limit 8+3 olacaq, legionerlər mütləq peşəkar statusunda olmalıdırlar. Son dəfə həvəskar klubda çıxış etmiş əcnəbi sifariş oluna bilməz.

PFL rəsmisi sonda əlavə edib ki, bütün liqalarda infrastruktura cavab verən qalib komanda bir üst liqaya vəsiqə qazanacaq, idman prinsiplərinə tam əməl olunacaq.

Daha sonra həm I, həm də II Liqada ilk turun püşkü atılıb.

I liqa, ilk tur

"Difai Ağsu" - MOİK

"Zaqatala" - "İrəvan"

"Karvan" - "Mingəçevir"

"Qaradağ Lökbatan" - "Şamaxı"

"Araz Saatlı" - "İmişli"

II Liqa, ilk tur

"Ağdaş" - "Şahdağ Qusar"

"Baku Sportinq" - "Şəfa Baku"

"Şəki City" - "Dinamo"

"Lerik" - "Qusar"

"Şəmkir" - "Kür-Araz"

"Füzuli" - "Cəbrayıl"

"Göygöl" - "Kürmüx Qax"

Fərəc ASLANOV