Murad Musayev: “Azərbaycan çempionatı barədə fikrim tam dəyişib”

Azərbaycan Premyer Liqasının XI turunda “Sabah” səfərdə “Neftçi” üzərində 3:2 hesablı qələbə qazanıb.

Futbolxeber.az saytının məlumatına görə, matçdan sonra təşkil olunan mətbuat konfransında “Sabah”ın baş məşqçisi Murad Musayev komandasının qələbəsini belə şərh edib:

“Parlaq oyuna şahidlik etdik. 90 dəqiqə ərzində meydanda gərginlik vardı. Vurduğumuz qolların keyfiyyətli olması xoşdu. Bəzi anlarda rəqib üstünlüyə yiyələnirdi. Hesab 3:0 olarkən 4-cü, 5-ci qolları vurmaq olardı. Heç vaxt arxayınlaşmaq olmaz. Səhvlərimizi düzəltməli, gələcəkdə daha yaxşı oynamalıyıq”.

- Yayda heyətə yeni futbolçular cəlb etdiniz. Komandanı gücləndirdiniz. Bundan başqa “Sabah”da nəyi dəyişdiz?

- Gündəlik işimizi görürük. Düşünmürəm ki, bu, ancaq mənim uğurumdu. Rəhbərliyin də, futbolçuların da qazandığımız uğurlarda rolu var. Lakin indidən uğur barədə danışmaq tezdi. Yalnız mövsümün sonunda komandanın nəticəsi barədə danışmaq olar. Artıq bugünkü qələbəni unudub “Qəbələ” ilə qarşılaşma barədə düşünmək olar.

- Bu oyunu Rusiya Premyer Liqasının matçları ilə müqayisə etmək olar?

- Əlbəttə olar. Düşünürəm ki, biz və “Neftçi” Rusiyada ilk 8-likdə ola bilərik. “Qarabağ” isə Rusiyada “Zenit”lə çempionluq uğrunda mübarizə apara bilər. Azərbaycan çempionatı barədə fikrim tam dəyişib. Bu gün hətta “Şamaxı”nı da asanlıqla uda bilməzsən.

- 3:0-dan sonra komandanızın meydanda sakitləşməsinin səbəbi nə idi?

- Bu, psixologiyadan irəli gəlir. Bir vacib oyunçumuz da zədələndi. Bunun da çıxışımıza təsiri oldu. Rəqib ilk qoldan sonra daha da fəallaşdı. Bir səhv bizə baha başa gələ bilərdi. Lakin bugünkü oyun bizim üçün dərs olmalıdı. Meydanda 90 dəqiqə mübarizə aparmaq lazımdı.

- “Sabah” “Qarabağ”ın hegemonluğuna son qoya bilər?

- Açığı, bunu etmək çox çətindi. Gənc klubumuz var. “Sabah” cəmi 5 ilin komandasıdı. İlk addımlarımızı atırıq. Bu gün “Qarabağ” barədə düşünməməli, turnir cədvəlinə baxmamalıyıq. Bu gün yalnız növbəti matç barədə düşünməliyik. 4-5 il komanda ilə işləsəydim, deyərdim ki, bəli, “Qarabağ”la mübarizə apara bilərik. Amma bugünkü gündə yalandan söz vermək istəmirəm.

- David Volkov “Zirə”də daha parlaq çıxış edirdi. “Sabah”da onun yaxşı çıxış etməməsinin səbəbi nədir?

- Razıyam ki, Volkovun böyük potensialı var. O, daha yaxşı oynaya bilər. Məşqlərdə David, özünü çox yaxşı tərəfdən göstərir. Düşünürəm ki, tezliklə o, irəliyə doğru inamlı addım atacaq.