Mahmud Qurbanov: “Sarı” ilə də kifayətlənmək olardı”

"Səbail”in baş məşqçisi Mahmud Qurbanov Premyer Liqanın XI turunda “Şamaxı” ilə qarşılaşdıqları oyundan sonra fikirlərini bildirib.

Futbolxeber.az saytının məlumatına görə, o, matça pis başlamadıqlarını söyləyib: "İlk 20 dəqiqə üstünlüyümüz ilə keçdi. Hesabı da aça bilərdik. Əfsus olsun ki, Turala erkən “qırmızı” verildi. “Sarı” ilə də kifayətlənmək olardı. Bu, ilk hissədə oyunumuza təsir etdi. Fasilədən sonra yaxşı oynadıq. Hiss edilmirdi ki, azlıqdayıq. Qorxaq futbol oynamadıq. İmkanlar yaratdıq".

Qurbanov hakimliklə bağlı danışmaq istəmədiyini, amma buna məcbur olduğunu vurğulayıb: "Bir neçə oyundur ki, penalti epizodlarımız verilmir. Hər iki komandaya eyni baxmaq lazımdır. Autdan ofsayd qərarı verildi. Yəqin Azərbaycanda belədir. Hər şey aydındır. Buna şərh vermək istəmirəm. Qələbə qazanmaq istəyirdik. Yaxşı oynadıq. 3 xal istəyirdik, lakin alınmadı. Qarşıdakı matçlara baxacağıq. Dördüncü hakimlə bəzi epizodları hər zaman danışırıq. İnqilab Məmmədovla danışa bilmədim. Yaxınlaşmaq olmur. Dedi bildim. Həm gülməli, həm də acınacaqlıdır. Texnologiyanın belə inkişaf etdiyi vaxtda, autdan top başlanılır və ofsayd qərarı verilir. Bu, hakimliyə yaraşmayan şeydir”.