Rəşad Sadıqov: “Məndən çox şey gözlənilməsi məni sevindirir”

“Çətin oyun olacağını bilirdik. Samir Abasovun gəlişindən sonra “Sumqayıt” oyun baxımından yaxşılaşdı. İndi komanda daha dinamik və aqressiv oynayır. Səfərin ağır olacağını bilirdik. Oyuna yaxşı başladıq, qol vurduq. Amma bundan sonra oyun planında passivləşdik, rəqibə daha sərbəst oyunmağa imkan verdik”.

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov Azərbaycan Premyer Liqasının 11-ci turunda səfərdə "Sumqayıt"a 2:0 hesabı ilə qalib gəldikləri oyundan sonra keçirilən mətbuat konfransında deyib

"İkinci hissədəki dəyişikliklərdən sonra dinamika və aqressivliyimiz artdı və oyunun bu hissəsindən razı qaldım. İkinci qolu da vura bildik və bundan sonra daha çox qol epizodlarımız oldu. Vacib qələbə qazandıq. Sumqayıt səfərləri həmişə çətin olur və bu oyun da istisna deyildi", - deyə o bildirib.

Sadıqov Sərtan Taşkının bu mövsüm sonradan meydana çıxdığı oyunlarda ümumilikdə 4 qol vurması ilə bağlı söyləyib: "Bəzən elə futbolçular olur ki, oyuna sonradan daxil olanda özünü daha rahat hiss edir. Sərtan da o futbolçulardan biridir ki, ona 30-35 dəqiqə vaxt verəndə özünü daha yaxşı hiss edir. Bu ildə də hücum planında inkişaf görünür. Hücum xəttində itkilərimiz var idi. Oyunu sonradan gücləndirmək üçün futbolçumuz yox idi, ona görə Sertandan istifadə etdik. O da etimadı doğrultdu və biz də buna sevinirik".

O, "Zirə"dəki karyerasından razı olub-olmadığı ilə əlaqədar sualı belə cavablandırıb: "Təbii ki, səndən çox şey gözləyirlərsə, bu, adamı sevindirməyə bilməz. İki il yarımı təhlil etsək... İlk ilimdə, "Neftçi"nin çempion olduğu mövsümdə möhtəşəm idi. "Qarabağ"ı da nəzərə almalıyıq. Mövsümboyu üçlükdə getmişdik, çempionatda və kubokda müəyyən haqsızlıqlarla üzləşmişdik. Finaldan necə məhrum olduğumuz hamının yaddaşındadır. Keçən il üçüncü olduq, kubokda finala çıxdıq. "Qarabağ" və "Neftçi" bizdən öndə bitirib. Maksimumuzu verə bilmişik. Daha yaxşı ola bilərdi? Bəli, ola bilərdi. Məşqçi hər zaman qarşısına maksimum nəticə qoymalıdır, amma müəyyən reallıqlar da var və bunu da nəzərə almaq lazımdır. Məndən çox şey gözlənilməsi məni sevindirir".

R.Sadıqov ölkə çempionatında növbəti turda “Neftçi” ilə keçiriləcək oyundan da danışıb: “Təbii ki, bu görüş turnir baxımından çox önəmli olacaq. “Neftçi” və ya “Qarabağ” kimi komandalarla oyunlarda qazanılan hər xal önəmlidir. Bəzi itkilərlə hazırlaşacağıq. Hacıağa Hacılı da cəzalı duruma düşdü. Əlimizdən gələn hər şeyi edəcəyik. Cədvəldə mümkün qədər yuxarı qalxmağı planlaşdırırıq. Amma biz “Neftçi” ilə görüşə altı xallıq oyun kimi baxmırıq".

Baş məşqçi Azərbaycan kubokunun püşkatmasının nəticələrinə də münasibət bildirib: “Artıq 3-cü ildir ki, “Zirə”də baş məşqçiyəm, "Mingəçevir"i keçsək, yenə “Neftçi” ilə qarşılaşacağıq. Hər iki komanda kubokda irəliləmək istədiyi üçün maraqlı oyun olacaq. Yarımfinalda uduzmaqdansa, 1/4 finalda uduzmaq daha yaxşıdır.  "Mingəçevir"i keçsək, seçim etsəm ki, "Neftçi" ilə yarımfinalda, yoxsa 1/4 finalda qarşılaşım, daha yaxşısı 1/4-dir. Yarımfinalda güc sərf edirsən, çempionat matçları olur. "Neftçi" kubokda favoritlərdən biridir.  Ona görə də erkən mərhələdə onlarla qarşılaşsaq, daha yaxşı olar".