Ayaz Quliyev Azərbaycan millisi barədə: "Məni istəyirlər, amma..."

Rusiyanın "Ximki" klubunun yarımmüdafiəçisi Ayaz Quliyev Azərbaycan millisində oynamaq ehtimalından danışıb. 

Futbolxeber.az saytının məlumatına görə, 25 yaşlı yarımmüdafiəçi Rusiya mətbuatına açıqlamasında millimizdə oynaması üçün AFFA-nın konkret addım atmalı olduğunu bildirib:

"Federasiya ilə daimi əlaqə saxlayıram, amma heç vaxt yekun təklif etməyiblər. Hər şey səthidir, konkret söhbət olmur. Belə çıxır ki, məni istəyirlər, amma heç nə etmirlər. Mənim üçün bir yerdə oturmaq, danışmaq, bir-birimizi dinləmək və ortaq nöqtəyə gəlmək lazımdır".

Moskva "Spartak"ının yetirməsi olan Quliyev "Azərbaycan millisində oynamağa hazırsanmı" sualını belə cavablandırıb: "Mən ancaq konkret danışıqlardan sonra nəyin necə olduğunu biləcəyəm. İndi nə "hə", nə də "yox" deyə bilərəm. Tələsik qərarlar vermək istəmirəm”

Qeyd edək ki, bir müddət əvvəl AFFA-nın A.Quliyevi yığmanın növbəti matçlarına qədər milliləşdirmək istədiyi barədə xəbərlər yayılmışdı.