Bu stadion nə Mozambikdədi, nə də Uqandada: Bakının 60 kilometrliyindədi

Dünən həvəskarlar arasında keçirilən Azərbaycan çempionatında növbəti oyunlar keçirilib.

Futbolxeber.az saytının məlumatına görə, “Bakı” səfərdə “Ələt Port”un qonağı olub. Görüş “zolaqlılar”ın 3:2 hesablı qələbəsi ilə başa çatdı.

“Bakı”nın həvəskar liqasında olması təəccüblü olsa da, artıq bir neçə aydır buna öyrəncəliyik. 3:2 hesabında da qəribə heç nə yoxdur. Qəribə olan oyunun keçirildiyi stadiondur.

Olmayan qazonun durumunu təsvir etmək mümkünsüzdür. Yaxşısı budur, aşağıdakı videonu izləyək. 

:

Göründüyü kimi, Ələt stadionunda qazondan, heç olmasa saralmış otdan belə, əsər-əlamət yoxdur. Komandalar torpaqda mübarizə aparırlar. Vəziyyət o qədər acınacaqlıdır ki, topa zərbə endirdikdən sonra göyə qum dənəcikləri qalxır.

2 dəfə Azərbaycan çempionu olmuş, 3 dəfə kuboku qazanmış, Çempionlar Liqasının III təsnifat mərhələsinə yüksəlmiş. Avroliqanın pley-offuna vəsiqə qazanmış ilk Azərbaycan klubu olan "Bakı"nın belə stadionda oynamağa məcbur qalması təəssüf doğurur. 

Məcburiyyətdən “Bakı”nın oyunçuları butsı ilə deyil, krasovkada meydana .çıxmışdılar.

Videolardan da göründüyü kimi, Ələt stadionu biabırçı vəziyyətdədir. İlk baxışdan videoya baxanda kimsə düşünə bilər ki, bura hansısa Afrika ölkəsidir. Amma bəlkə Afrikanın inkişaf etməmiş ölkələrində belə biabırçı stadion yoxdur. Bəli cənablar, bura Mozambik, Uqanda, Lesoto yox, Bakının 60 kilometrliyində yerləşən Ələt stadionudur.

Azərbaycan çempionatı həvəskarlar arasında keçirilsə də, arenanın belə durumda olması biabırçıdır. Axı həvəskarlar arasında ölkə çempionatını da keçirən AFFA-dır.

O AFFA ki illik büdcəsi bəlkə də 30 milyondan artıqdır. O AFFA ki şəhərin bir çox yerlərindəm süni qazonlu meydançalar salmaqla futbolun kütləviliyinə çalışdığını iddia edir. O AFFA ki tez-tez bölgələrdə futbolun inkişafından danışır. Bakıdan cəmi 60 km aralıda olan bir yerdə, bu cür stadionda futbolçu necə yetişəcək?

3 ildən sonra Avropa çempionatının 4 oyununu qəbul edəcək, 2 ildən sonra Çempionlar Liqasının, ən pis halda Avroliqanın finalına ev sahibliyi etmək istəyən bir federasiyanın bu cür biabırçı duruma biganə qalması, hələ belə yararsız stadiona ölkə çempionatının oyununu təyin etməsi gülüncdür.