"Sumqayıt"ın baş məşqçisi qələbəni şərh etdi

“Basketbolçularıma qəhrəman kimi döyüşdüklərinə görə minnətdaram”.

Futbolxeber.az saytının məlumatına görə, bunu "Sumqayıt"ın baş məşqçisi Vadim Kuramşın Azərbaycan Basketbol Liqasında "Lənkəran"a 88:83 hesabı ilə qalib gəldikləri XVI turun oyunu ilə bağlı klubun mətbuat xidmətinə açıqlamasında deyib.

O, oyunçularını qələbə münasibəti ilə təbrik edib: "Bizim üçün vacib qalibiyyət idi. Həqiqətən də matç çox gərgin keçdi. Nəzərə alaq ki, heyətdə ciddi itki var idi. Səhhətində problem yaşadığına görə Eli Lourensi Lənkərana gətirə bilmədik. Məcburiyyətdən üç əcnəbi və iki yerli basketbolçu ilə oynamalı olduq. Uşaqlar belə çətin vəziyyətdə bir-birilərinə dəstək oldular. Xüsusən də ilk hissədə Zaur Quşanov 4 dəfə dəqiq "üçlük" atmaqla komandanı arxasınca daşıdı".

Mütəxəssisin sözlərinə görə, fasilədən sonra Zayon Yanq oyunu öz üzərinə götürüb: "O, bu gün 29 xal topladı və lazım olan anda hesab arasındakı fərqi artırdı. Sevindirici haldır ki, "Lənkəran"ı ardıcıl 3-cü oyunda da məğlub etdik. Qələbə seriyasını davam etdirmək ücün "Ordu"ya da qalib gəlib 4-cü pillədəki mövqeyimizi möhkəmləndirmək istəyirik".