DÇ-2026 üçün pley-off səbətləri müəyyənləşib

2026-cı ildə ABŞ, Kanada və Meksikada keçiriləcək dünya çempionatının Avropa zonası üzrə pley-off oyunlarının iştirakçılarının yer aldığı səbətlər müəyyənləşib.

Futbolxeber.az saytının məlumatına görə, səbətlərin tərkibi aşağıdakı kimidir:

I səbət: İtaliya, Danimarka, Türkiyə, Ukrayna;

II səbət: Polşa, Uels, Çexiya, Slovakiya;

III səbət: İrlandiya, Albaniya, Bosniya və Herseqovina, Kosovo;

IV səbət: İsveç, Rumıniya, Şimali Makedoniya, Şimali İrlandiya.

Pley-off iştirakçıları mundiala vəsiqə uğrunda iki tək matçlıq raund - yarımfinal və final qarşılaşmaları oynayacaqlar.

Yarımfinal oyunları martın 26-da, final görüşləri isə martın 31-də keçiriləcək. Pley-offun püşkatma mərasimi isə noyabrın 20-də olacaq.

1-ci səbətdəki komandalar 4-cü səbətdəki millilərlə, 2-ci səbətdəki yığmalar isə 3-cü səbətdəki ölkələrin təmsilçiləri ilə üz-üzə gələcəklər.