PSJ-nin müdafiəçisi: "Azərbaycan millisi asan rəqib deyil"

Ukrayna millisinin üzvü İlya Zabarnı DÇ-2026-nın seçmə mərhələsində Fransa və Azərbaycanla keçiriləcək oyunlar haqqında danışıb.

Futbolxeber.az saytının xarici KİV-ə istinadən verdiyi məlumata görə, ötən ay "Bornmut"dan PSJ-yə keçən müdafiəçi hər iki rəqiblə oyunun çətin olacağını bildirib:

"Bu oyunları səbirsizliklə gözləyirəm. Bu görüşlər bizim və düşünürəm ki, bütün Ukrayna üçün çox vacibdir. Ona görə də yaxşı hazırlaşacağımıza inanıram. Fransa güclüdür, amma oynamaq mümkündür. Həmçinin ikinci oyunumuz Azərbaycana qarşı səfərdə olacaq. Bu da çətin olacaq, asan rəqib deyil. İndi xal toplamalıyıq ki, hər şeyi son oyuna saxlamayaq".

Qeyd edək ki, Ukrayna millisi sentyabrın 5-də Fransanı qəbul edəcək. Komanda sentyabrın 9-da isə Azərbaycan millisinin qonağı olacaq.