Rüfət məhsuldar ötürmə verdi, komandası Zaqreb “Dinamo”sundan xal aldı

Xorvatiya çempionatında beşinci turun oyunları keçirilir.

Futbolxeber.az saytının məlumatına görə, həmyerlimiz Rüfət Abdullazadənin formasını geydiyi “Varazdin” öz meydanında Zaqreb “Dinamo”sunu qəbul edib.

24 yaşlı yarımmüdafiəçi matça ehtiyat oyunçular skamyasından başlasa da, 46-cı dəqiqədə Leon Belcarın əvəzinə meydana çıxıb. Həmin vaxt “Dinamo” 1:0 hesabı ilə öndə olub.

Rüfət oyuna əla qoşulub. 52-ci dəqiqədə məhz həmyerlimizin məhsuldar ötürməsindən sonra Aleksa Latkoviç hesabı bərabərləşdirib. 80-ci dəqiqədə Antonio Borsiç “Varazdin”i hesabda önə keçirib. Lakin Rüfətin komandası qələbəni əldən verib. 90+1-ci dəqiqədə Vane Yovanovun qırmızı vərəqəsi alması ilə azlıqda qalan “Varazdin” 90+2-də qapısında qol görüb. Penaltini dəqiqə yerinə yetirən Sandro Kulenoviç “Dinamo”nu məğlubiyyətdən xilas edib - 2:2.

Qeyd edək ki, 5 turdan sonra 6 xalı olan “Varazdin” 4-cü pillədə qərarlaşıb. Turnir cədvəlinə isə 13 xalla “Dinamo” başçılıq edir.

Xatırladaq ki, bu yay “Səbail”dən ayrılan Rüfət Abdullazadə Xorvatiya təmsilçisi ilə 3 illik müqavilə imzalayıb.