“Ferensvaroş”un qapıçısı: “Cütün taleyi bir oyunda həll olunmayacaq”

“Ferensvaroş”un qapıçısı Dibuş Denes UEFA Çempionlar Liqasının pley-off mərhələsində “Qarabağ”a qarşı keçirəcəkləri oyunlardan danışıb.

Futbolxeber.az saytının məlumatına görə, təcrübəli qolkiper “Metropol” nəşrinə açıqlamasında “Qarabağ”a ehtiyatla yanaşdığını gizlətməyib.

34 yaşlı qolkiper deyib ki, bu, bir yox, iki görüşdən ibarət qarşılaşma olacaq, ona görə də 180 dəqiqəyə hazırlaşmalıdırlar: “Biz ilk oyunda meydana artıq mərhələnin taleyini həll etmək məqsədilə çıxmayacağıq. Bu cütün taleyi bir oyunda həll olunmayacaq. Çox qollu matç gözləmirəm. Vacibdir ki, cavab görüşünə üstünlüklə gedək. Düşünürəm ki, təxminən eyni gücdə olan iki komanda qarşılaşacaq. Hər şey yenə dönüş nöqtələrindən asılı olacaq - kim bunlardan daha yaxşı istifadə edə biləcək, bir hakim qərarı və ya fərdi ustalıq nümunəsi hansı tərəfin xeyrinə olacaq – bunlar nəticəni dəyişə bilər. Məncə, çox xırda detallar həlledici ola bilər. Ən vacibi odur ki, öz işimizi çətinləşdirməyək. Bacardığımızı meydana qoyaq. Əgər hər şey yolunda getsə, mərhələ adlayıb Çempionlar Liqasının qrup mərhələsində iştirak etmək şansımız böyük olacaq” .

Xatırladaq ki, “Ferensvaroş”la “Qarabağ”a arasındakı ilk oyun avqustun 19-da Budapeştdəki “Ferens Puşkaş” stadionunda keçiriləcək. Avqustun 27-də isə komandalar Bakıda üz-üzə gələcəklər.