“Neftçi” ilə oyuna yollanmaq əvəzinə atamın dəfninə uçdum”

ÇSKA-nn sabiq futbolçusu Yevgeni Aldonin 2004/2005 mövsümünün avrokubok oyunlarından danışarkən Çempionlar Liqasının təsnifat mərhələsində “Neftçi”yə (0:0, 2:0) qarşı keçirdikləri matçlara da toxunub.

Futbolxeber.az saytının “Sport Ekspress”ə istinadən verdiyi məlumata görə, veteran futbolçu “Neftçi” ilə görüş ərəfəsində atasının vəfatı barədə danışıb:

“Biz təsnifat mərhələsində “Neftçi” və “Reyncers”i geridə qoymalı idik. Həmin vaxtı avrokubok yolumuz mənim şəxsi faciəmlə üst-üstə düşdü. Atam Bakıdakı oyunumuzdan bir gün əvvəl qəzada həyatını itirdi. “Neftçi” ilə oyuna yollanmaq əvəzinə atamın dəfni üçün Krıma uçdum. Bakıdakı matçı buraxdım, amma evdə “Neftçi”yə qarşı görüşdə bir hissə oynadım və azarkeşlərin açdığı “Jenya bərk dayan” yazılı pankartı gördüm. Vəziyyət çox ağır olsa da, bunu görmək xoş idi. Beləliklə, işləməklə, oyunları uğurlu oynamaqla, Çempionlar Liqasına düşmək arzusunu reallaşdırdıq. “Neftçi” və “Reyncers”i böyük ölçüdə Vaqner Lavın qolları sayəsində keçdik”.