Arda Turan Ukrayna klubunu çalışdıracaq?

Türkiyənin “Eyüpspor” klubunun baş məşqçisi Arda Turanla bağlı gözlənilməz iddia səsləndirilib.

Futbolxeber.az saytının “Sport Digitale”ə istinadən verdiyi məlumata görə, 38 yaşlı mütəxəssis karyerasında ilk dəfə əcnəbi klubu çalışdırmaq ərəfəsindədir.

Ötən mövsümün yekununda “Eyüpspor”u yüksək liqaya çıxaran, bu mövsüm isə Superliqada uğurlu çıxış edən Arda Turanın Ukraynanın “Şaxtyor” klubuna keçməyə yaxın olduğu bildirilib.

Xəbərə əsasən, Arda Turan ilə Donetsk təmsilçisinin nümayəndələri Londonda görüşüblər və rəsmi danışıqlar aparılıb.

Görüşdə tərəflərin bir çox məsələdə razılığa gəldiyi vurğulanıb.

“Eyüpspor”la ümumilikdə 80 oyuna çıxan Arda Turan bu matçlarda 44 qələbə, 22 məğlubiyyət və 14 heç-heçə əldə edərək, orta hesabla hər oyuna 1.83 xal qazanıb.