“Traktor” İran çempionu oldu!

“Traktor” 2024/25 mövsümü İran Pro Liqasının qalibi olub.

Futbolxeber.az saytının məlumatına görə, Təbriz təmsilçisi tarixində ilk dəfə ölkə çempionu adını qazanıb.

“Traktor” mövsümün sonuna 2 tur qalmış qızıl medalları təmin edib. Draqan Skoçiçin baş məşqçisi olduğu komanda bu gün 28-ci turda səfərdə - Qəzvində yerli “Şəms Azar” üzərində 4:0 hesablı qələbə qazanıb və xalını 64-ə yüksəldib.

Cənubi Azərbaycan klubunun ən yaxın izləyicisi olan “Sepahan” (İsfahan) isə öz meydanında “Qohar”a uduzub - 1:2 və 56 xalda qalıb.

Beləliklə, “Sepahan”ın bu məğlubiyyətindən sonra onunla “Traktor” arasında xal fərqi 8-ə yüksəlib. Bu isə o deməkdir ki, son 2 turun nəticəsindən asılı olmayaraq, “Traktor” hazırkı mövsümü lider kimi başa vuracaq.

Əlavə edək ki, bunadək “Traktor”un İran yüksək liqasında ən yaxşı nəticələri 3 dəfə 2-ci yeri, 2 dəfə isə 3-cü yeri tutmağı olmuşdu.