Ehtiram Quliyev: “Qərarın haqsız olduğu düşüncəsindəyik”

“Maraqlı qarşılaşma oldu. Matçın əvvəlində oyunumuz alınmadı. Çempionatımız elə mərhələyə gəlib ki, hər matç çox vacibdir. Təbii ki, üzgünük. Azarkeşlərimizin qarşısında məğlub olmaq bizi məyus edir. Amma növbəti oyunlara baxacağıq. Çempionat uzun marafondur. Ümid edirəm ki, lazım olan xalları yığacağıq”.

Futbolxeber.az saytının məlumatına görə, bu sözləri "Turan Tovuz" klubunun İdarə Heyətinin sədri Ehtiram Quliyev deyib.

Azərbaycan Premyer Liqasının 25-ci turunun "Zirə" ilə görüşündən (0:2) sonra jurnalistlərə açıqlama verən Quliyev İntizam Komitəsinin "Turan Tovuz"u 20 min manat cərimələməsinə belə münasibət bildirib: “AFFA-nın qərarını anlayışla qarşılayırıq. Ölkə futboluna onlar nəzarət edir. Biz də klubun maraqlarını qorumaq üçün mövqeyimizi bildiririk, bildirəcəyik. Üzücü səbəb o oldu ki, AFFA ilə dialoqumuzun ən gözəl vaxtında belə hal baş verdi. Buna görə üzgünük. İstər futbol ictimaiyyəti, istər azarkeşlərimiz tərəfindən elə hesab olundu ki, qarşıdurma var. Əslində qarşıdurma yoxdur. Bir çox mövzularda AFFA-nın bizə dəstəyi var. Dialoqumuz yüksək səviyyədə davam edir. Qərarın haqsız olduğu düşüncəsindəyik. Amma anlayışla qarşılayırıq. Nə ilk cəza alan bizik, nə də sonuncu biz olacağıq”.

O, apellyasiya şikayəti verməyəcəklərini qeyd edib: “Səbəbi haqsız olmağımız deyil. Sadəcə süni gərginlik yaranmaması, azarkeşlərimizin fikrinin oyunlara yönəlməsi baxımından belə uyğun hesab elədik. Yenə İdarə Heyəti bununla bağlı toplanacaq”.

Klub rəhbəri AFFA-nın bu məsələdə haqlı tərəf olduğunu düşünmür: “Klubun fikirlərini dilə gətirdik ki, oyun təxirə salınsın. İstədiyimiz çox böyük bir şey deyildi. Ola bilər ki, uyğun zamanda, uyğun mövqedə olmadı, başqa səbəblər var idi. AFFA da ölkə futboluna nəzarət edir. Yəqin ki, belə uyğun hesab elədilər. Böyüdüləsi bir mövzu deyil”.

E.Quliyev matçın təxirə salınması ilə bağlı istəklərini qərəzdən irəli gəlmədiyini vurğulayıb: “VAR sistemi niyə gətirilib? Hakim də insandır, görməyə bilər. Biz əsla qərəz düşünmədik. Haqsızlığın qarşısını almaq üçün belə bəyanat verdik. Klubun istəyidir də, dünyanın sonu deyil ki. Biz istədik, onlar da yox dedi”.

O, AFFA-nın qərarından sonra sponsorun futboldan küsdürülmə ehtimalına da toxunub: “Əsla. Üzüldüyüm şey o oldu ki, bunlar dialoqumuzun ən yaxşı vaxtında oldu. Orada peşəkar insanlar işləyir. Yeni qərarlar qəbul olunub. Biz klublar olaraq dəstək olmalıyıq. Biz özümüzə qarşı qərəzli mövqe hiss etmirik. Əksinə, daha müsbət, daha pozitiv addımlar hiss edirik. Bir çox sahədə bizə dəstək olurlar. Bundan sonra da hakim nöqsanları olsa, mövqeyimizi, etirazımızı bildirəcəyik. "Zirə" ilə matçda normal hakimlik oldu. Yaxşı şeyləri o qədər az dilə gətiririk ki, insanlar mövqe seçir. Əvvəl Hakimlər Komitəsinə təyinatla bağlı fikir bildirmişdim. Bu gün də deyirəm, çox gözəl təyinatdır. Keçən illə bu ili müqayisə etmək lazımdır. Çox dəyişikliklər olub. Hakimlər Komitəsi açıq-aydın fikrini deyir. Bəzən demirlər, onları da anlayışla qarşılayırıq. Biz sual veririk. Hər şey cavablana bilməz. Onların səssiz durması belə bizə mesajdır, əmin oluruq ki, haqlı mövqedəyik. UEFA-nın təlimatları var, hakimlərin səhvləri çox şişirdilməsin. Ona görə də hər şeyə reaksiya verilməməsini anlayışla qarşılayırıq. "CBC Sport" komandası ilə bağlı mənfi fikirlərimiz yox idi, hava şəraitini biz də görürdük. Oyuna mən də gedə bilməmişdim. Onlar çox əziyyət çəkirlər. Oyun azarkeşlər üçündür. İstəyirdik ki, həm bizim, həm rəqibin azarkeşləri oyuna baxsınlar. Böyüdüləsi bir səbəb yoxdur. Hamımıza təşəkkür edirəm”.

“Turan Tovuz”un rəhbəri hazırda gözəl oyundan çox nəticə barədə düşündüklərini söyləyib: “Nəticə verməliyik, il boyu çəkilən əziyyətlərin bəhrəsini görməliyik. Zədələr, əskiklərimiz oldu. Yavaş-yavaş toparlanırıq. Ümid edirəm ki, qış transferlərimiz də var komandaya uyğunlaşandan sonra daha yaxşı olacağıq. Az qaynağımızı əlverişli istifadə etdik. Gün keçdikcə komanda yaxşı olacaq”.